Haustspá Siggu Kling – Fiskurinn: Hentu í burtu leiðinlegum hugsunum

Elsku Fiskurinn minn, það er svo mikilvægt að þú hugsir bara eins og býfluga, en hún veit ekki að samkvæmt vísindalegum staðreyndum á hún alls ekki að geta flogið, en hún flýgur samt því að engin hefur hvíslað þessu að henni!

Taktu þér þetta til fyrirmyndar því allt er hægt en ef einhver segir við mann að maður geti ekki þetta eða hitt þá festist það í frumunum og þú getur sjálfur verið þér allra verstur með þetta, ég get ekki þetta og ég er ekki nógu góður í hinu eða þessu – það er bölvuð vitleysa, þú hefur svo sterkan vilja og vilji er allt sem þarf.

Sjáðu það skýrt fyrir þér hvað þú vilt þá færðu þránna til að framkvæma og það sem þú sérð fyrir þér byrjar að gerast. Þú ert það sem þú hugsar svo að hentu í burtu leiðinlegu hugsunum þínum rétt eins og þegar þú hreinsar til í tölvunni þinni og „delete, delete, delete“.

Einu sinni sagði Solla á Gló við mig þú ert það sem að þú borðar, þá svaraði ég henni ég er þá súkkulaði en þú ert þá blómkál, svo hlógum við. Það er svo gott að hlægja að vitleysunni og ef að þú horfir til baka þá áttu mörg tímabil sem að þú varst hreinlega að deyja úr stressi, og sást ekkert nema svart, en núna getur þú hlegið að mörgum þessum vitleysum. 

Hláturinn og grínið, það er að gera grín að sjálfum sér og atburðum sem þér þóttu ömurleg upplifun styrkir þig svo sannarlega, svo leyfðu engum stoppa þig í því að vera einlægur, láttu allt flakka sem þig langar að segja, en settu þennan dásamlega húmor inn í orðin þín.

Þú skerð þig afskaplega mikið úr og ef það er eitthvað stjörnumerki sem ég get svo sannarlega þekkt út frá hinum þá ert það þú minn kæri Fiskur. Þú ert svo hnarreistur og spennandi að manni langar virkilega að kynnast þér betur, gefðu fleirum aðgang að þér, hleyptu nýjum vinum inn í líf þitt, og gerðu eitthvað nýtt í hverri viku sem ögrar þér og þá finnurðu hvernig þú sjálfur breytist til hins betra og upplifir hvernig lífið verður tvöfalt skemmtilegra næstu mánuði.

Það er nýbúið að vera fullt tungl í þínu merki og þess vegna verða ótrúlegustu óskir að veruleika, hafðu fjölbreytta sýn á því sem lífið gæti boðið þér. Því þú mátt ekki detta í þá gryfju að þú haldir að eina leiðin til þess að bjarga þér sé að vinna í Lottó, því þú lærir nefnilega að sigra með því að tapa. Svo láttu það að tapa ekkert hafa áhrif á þig því að þú ert á hárréttri leið að dásamlegri framtíð. Hugsaðu frekar að eins og landsliðið okkar sem hefði ekki lært að sigra ef það hefði ekki haft mörg hundruð tapaða leiki á bakinu.

Svo að elsku Fiskur vendu þig á að fagna sigrum í lífi þínum hvort sem þeir eru litlir eða stórir, því að eftir því sem þú fagnar meira því meira færðu. Þú hefur ástina í hendi þér í hvaða mynd sem þú telur að hún sé, en ef það er búið að vera mikið af erfiðleikum í ástarlífinu, þá er komin tími til að breyta og breytingar eru í stjörnunum þínum sem að gefa þér möguleika á að snúa öllu við á örskotsstundu.

Frægir Fiskar: Elísabet Ásberg listamaður, Beggi hans Pacasar, Baltasar Kormákur leikstjóri, Díana Ómel fjöllistakona, Árni Johnsen, fyrrverandi þingmaður, Albert Einstein, Sigmundur Davíð Gunnlaugsson forsætisráðherra, Vigdís Hauksdóttir þingkona, Ilmur Kristjánsdóttir leikkona, Svavar Örn engill, Páll Óskar poppstjarna, Katla Sign og Baby Kling, Lína Rut listaperla, Nanna Lovísa dýranuddari, Höskuldur Kári Schram fréttamaður.