Hannaði seglkofa fyrir íslenskar aðstæður

Verði draumur arkitektsins Bartosz Domiczek að veruleika munu framúrstefnulegir kofar prýða íslenskt landslag. Kofana kallar hann The Northern Wisps Cabins og líkjast þeir helst háu segli. Hönnunin er engin tilviljun en Domiczek segir að lögun kofanna sé óður til íslenskrar sjósóknar.

Domiczek hefur ekki enn reist fyrsta kofann en hönnunin hlaut á dögunum fyrstu verðlaun í kofahönnunarkeppni Ronen Beckerman.

Þrátt fyrir að kofarnir séu auðveldir í uppsetningu segir arkitektinn að þeir séu nokkuð harðgerir - þeir verði að vera það ef þeim er ætlað að pluma sig í íslenskri veðráttu.

Reistur er viðarrammi sem boltaður er niður með járnfestingum ofan í steinsteyptan grunn. Yfir allt saman strengir Domiczek svo slitsterkan dúk sem líkist helst segli á skipi.

Inni í kofanum verður rúmgóð stofa með kamínu og eldunaraðstöðu. Svefnrýmið er svo staðsett fyrir ofan útidyrahurðina og þarf að klifra upp stiga til að komast í bólið.

Hér að neðan má sjá myndband sem kynnir kofa Domiczek til leiks sem og fleiri myndir af kofanum. Frekari upplýsingar og myndir má nálgast á vef Bartosz Domiczek.