Sumarspá Siggu Kling – Vatnsberinn: Ert á tímabili eins og Gullfoss, óstöðvandi og heillandi

Elsku Vatnsberinn minn, þú talar svo hreint út og hefur mjög sterka réttlætistilfinningu en svo er þessi sterki kraftur sem gefur þér sérstakt leyfi til að hanna það sem þú vilt frá þínu hjarta. Ef einhver getur farið yfir strikið við hinar ýmsu aðstæður þá hefur þú leyfi til að gera það og getur náð svo miklum tökum á öllum litum regnbogans að ég fyllist auðmýkt að horfa á þig skapa lífið.  Það er búið að vera svo mikið að gerast síðan um áramótin að þér hefur dottið í hug að biðja hið almáttuga um að gefa þér bara frið og ró og að ekkert sé nýtt að gerast. En mikið hryllilega yrði það nú leiðinlegt og óspennandi kafli í lífsögunni þinni.

Tilgangur þinn er svo sannarlega að hafa gaman, þú fæddist á jörðinni til að hafa fjör og skemmta þér, þú ákvaðst hvar þú myndir fæðast og og hvenær þú myndir deyja og það skiptir engu máli hversu margar gulrætur þú borðar í millitíðinni, þú ert búinn að ákveða upphafið og endann.  Og ef þér finnst ekki gaman ertu á lífsins stoppistöð sem þú valdir sjálfur. Þú ert núna á tímabili eins og Gullfoss, óstöðvandi og heillandi og já í raun með friðhelgi til þess að breyta ótrúlegustu kringumstæðum í réttan farveg sem er þinn hagur.

Það er svo mikilvægt þú skoðir að núna er núna, fortíðin er ekki til og framtíðin ekki heldur, þegar þú skilur það breytirðu öllu bara með orkunni sem þú gefur í þetta augnablik. Ekki líta á viðkvæmni þína sem veikleika því það er nákvæmlega það sem gerir þig svo sterkan svo opnaðu þig, þá færðu ástina, vináttuna og allt sem þig vantar.  Þínir andlegu hæfileikar munu svo sannarlega gefa þér þann kraft sem þú vilt, en þú verður að trúa og treysta nákvæmlega bara á sjálfan þig, því hið almáttuga er svo sannarlega tilbúið að hjálpa þér svo vertu bara viss, er það þetta sem þú vilt? Vertu Gullberi.

Faðmlag og knús, þín Sigga Kling

Frægir Vatnsberar: Pacas hans Begga, Geir Sveinsson handknattleiksþjálfari, Halla himintungl, Clark Gable leikari, Sveinbjörg Birna Sveinbjörnsdóttir borgarfulltrúi, Yoko Ono, Bjarni Benediktsson, fjármála- og efnahagsráðherra, Katrín Jakobsdóttir þingkona, Hilmir Snær Guðnason leikari, Rikka sjónvarpskona, María Ólafsdóttir Júróvisjónstjarna, Þóra Arnórsdóttir, ritstjóri Kastljóss, Gunna Dís útvarpskona, Höddi Magg, Andrea Róberts mannauður, Hilmar Hafsteinsson ofurfasteignasali, Rut Roberts flugfreyja hjá Icelandair, Ragnheidur Guðfinna sálfræðingur.