Hlynur áfram í Garðabænum: „Fannst ég þurfa að gera meira hérna“

Landsliðsfyrirliðinn Hlynur Bæringsson framlengdi í dag samning sinn við Stjörnuna. Hlynur verður 36 ára á árinu en sagði það hafa legið beint við að framlengja við Garðarbæjarfélagið.

Vísir greindi frá því í dag að Hlynur hafi skrifað undir til tveggja ára, líkt og Tómas Þórður Hilmarsson og Dagur Kár Jónsson.

„Ég er tiltölulega nýkominn að utan úr atvinnumennsku og vildi ekki vera að rífa þau [fjölskylduna] upp aftur. Þess utan þá fannst mér ég þurfa að gera aðeins meira hérna, þetta var ekki nógu gott í fyrra og við þurfum að gera betur en það,“ sagði Hlynur Bæringsson við Arnar Björnsson á blaðamannafundi Stjörnunnar í dag.

Tímabilið sem er að klárast í Domino's deild karla hefur verið ákveðin vonbrigði hjá Garðarbæingum. Þeir lentu í sjöunda sæti deildarinnar og duttu út úr 8-liða úrslitum gegn ÍR. Hrafn Kristjánsson hefur látið af störfum sem þjálfari og Arnar Guðjónsson tekið við.

„Það er mjög stórt fyrir okkur að fá Dag heim og nú eru tveir af okkar sterkustu byrjunarliðsmönnum úr Garðabænum og ég held að það sé mjög sterkt fyrir okkur og fyrir samfélagið.“

„Nýr þjálfari kemur með nýjar áherslur, hann er svolítið öðruvísi, svo það verða breytingar.“

„Ég held við getum sagt það strax að stefnan verður að gera betur. Það veltur svolítið á hvaða leikmenn við fáum, leikmannamál verða að heppnast vel og ef að það gengur þá stefnum við eins hátt og við getum, bara á toppinn og þess vegna titilinn.“

Hlynur sagðist handviss um það að fleiri leikmenn væru á leiðinni í Garðabæinn. „Ég bara veit ekki hverjir það verða.“

Ákvörðun Hlyns að halda áfram hjá Stjörnunni gefur vonir um að hann ætli sér einnig að halda áfram að spila með íslenska landsliðinu, en margir af eldri leikmönnum þess hafa tilkynnt það á síðustu misserum að landsliðsskórnir séu á leiðinni á hilluna.

„Ég ætla að spila eitthvað áfram á meðan það er hægt að nota mig. Það eru landsliðsverkefni í sumar og ég ætla að reyna að hjálpa þeim ef ég næ að koma mér í almennilegt stand.“

„Ég ætla ekki að fara ef ég næ ekki að gera það, ég fer kannski í aðeins öðruvísi hlutverk, maður fer kannski að færa sig aðeins á bekkinn.“

Það síðasta sem sást til Hlyns Bæringssonar í Stjörnuliðinu í vetur var hið umtalaða höfuðhögg sem hann fékk frá Ryan Taylor í þriðja leik liðanna í 8-liða úrslitunum. Hann var ekki með í fjórða og síðasta leik seríunnar og þá voru Stjörnumenn farnir í sumarfrí. Hvernig er heilsan í dag?

„Hún er ágæt. Ég var svolítið eftir mig eftir þetta en nú eru komnar einhverjar þrjár vikur síðan og ég hef það ágætt. Ég er ekkert byrjaður að æfa, er búinn að vera að slaka á. Það kemur svo í ljós þegar ég fer að æfa.“

„Það var svo mikil hræðsla í kringum þetta, með alla þessa menntuðu og ómenntuðu doktora út um allt þá var maður svolítið smeykur við þetta en ég vonast bara til þess að ég verði 100 prósent, ef ég verð ekki laminn illa í sumar,“ sagði Hlynur Bæringsson.