Kynna flug til Asíu í næsta mánuði

Wow air hyggst kynna flug til Asíu í næsta mánuði en Skúli Mogensen, forstjóri flugfélagsins, vonar að það muni bjóða upp á flug til fjórtán til fimmtán áfangastaða í heimsálfunni á næstu árum. Skúli var í viðtali við Air Transport World í gær.

Skúli segir að vöxtur Wow air á næstunni verði fyrst og fremst í Asíuflugi og að flugfloti félagsins gæti tvöfaldast á næstu árum. Flugflotinn mun telja 24 flugvélar í árslok. 

„Fyrir tveimur árum vorum við einungis með tvo áfangastaði í Norður-Ameríku. Nú bjóðum við upp á fjórtán áfangastaði svo ég get vel hugsað mér að við getum verið með fjórtán til fimmtán áfangastaði í Asíu. Þetta myndi gera Ísland að Dúbaí norðursins sem það hefur alla burði til að vera,“ segir hann.

Wow air flýgur eins og stendur til eins áfangastaðar í Asíu, Tel Aviv í Ísrael.