Bráðabirgðaflutningur á raflínum í skoðun

Úrskurðarnefnd Umhverfis- og auðlindamála hefur fellt úr gildi framkvæmdaleyfi vegna Lyklafellslínu. Bæjarstjóri Hafnarfjarðar segir úrskurðinn vonbrigði en bærinn hefur í áratug barist fyrir lagningu línunnar.

Lagning Lyklafellslínu 1 hefur verið forsenda þess að hægt verði að fjarlægja Hamraneslínur og flytja Ísal-línur. Það voru Hraunavinir og Náttúruverndarsamtök Suðvesturlands sem kærðu veitingu framkvæmdaleyfisins.

Virðist ógilding framkvæmdaleyfisins fyrst og fremst vera byggð á þeirri forsendu að ekki sé sýnt fram á að jarðstrengskostir séu ekki raunhæfir og samanburður á umhverfisáhrifum þeirra og aðalvalkosts hafi ekki farið fram með þeim hætti sem lög gera ráð fyrir. Línan hefur verið á framkvæmdaáætlun kerfisáætlunar 2015-2024 og því samþykkt af Orkustofnun. Framkvæmdin hafði einnig farið í gegnum mat á umhverfisáhrifum.

Haraldur Líndal Haraldsson, bæjarstjóri Hafnarfjarðar segir úrskurðinn vonbrigði þó að hann vilji ekki gera lítið úr áliti kærenda á málinu. 

„En við erum búin að standa í því á næsta ári núna í tíu ár í baráttu við að þessar línur verði fluttar úr Hamranesinu og því miður hafa þeir samningar sem gerðir hafa verið ekki náðst fram að ganga og núna þegar við vorum farnir að vona að framkvæmdir væru að byrja þá er ljóst að það verða einhverjar tafir á því,“ segir Haraldur. 

Hafnarfjarðarkaupstaður hefur fjárfest í mikilli uppbyggingu á svæðinu ásamt lóðarhöfum á svæðinu en gert er ráð fyrir um 520 íbúðum og verið er að byggja grunn- leik- og tónlistarskóla ásamt íþróttasal fyrir um fjóra milljarða króna. Haraldur segir að ef töfin á afgreiðslu málsins verði of mikil er til skoðunar að ráðast í bráðabirgðaflutning á Hamranes- og Ísal-línu.

„Við erum nú að fara yfir úrskurðinn og þar eru ákveðnar ábendingar um hvað er hægt að gera til að ráða bót á þessu, hvort að það dugi vitum við ekki en við erum svona að fara yfir þetta mál. Við óskuðum eftir því við fulltrúa Landsnets sem voru með okkur á fundi í morgun að þeir myndu koma á fund bæjarráðs á fimmtudaginn í næstu viku þar sem við færum yfir málið og þá með einhverjar hugmyndir um hvernig við munum bregðast við. En það kemur til greina að fara í bráðabirgðaflutning á þessum línum en það er á frumstigi að skoða það, ef okkur sýnist að tafirnar yrðu það miklar að það borgaði sig að skoða það.“