Marsspá Siggu Kling – Nautið: Nautið er eins ástríðufullt og eldspúandi dreki

Elsku hjartans Nautið mitt, þú gefur þér sjálft að þú sért svo þrekmikil og ákveðin persóna, og þar með bregstu oft of harkalega við litlum atriðum sem geta brotið þig niður og þú grátið sáran. Eina ráðið sem ég get gefið þér við þessu er að vera svolítið kærulaus og slaka á, því þú þarft að treysta því að hlutirnir í kringum þig og lífið gangi upp og muni raða sig nákvæmlega eins og er best fyrir þig. Ef þú ferð yfir strikið og pirrar þig á öllu þá verður allt bara leiðinlegt og ef það er eitthvað sem þú þolir ekki þá eru það leiðindi.

Þeir sem hafa Naut sem maka eru svo ótrúlega heppnir því að Nautið er eins ástríðufullt og eldspúandi dreki, dýrkar og dáir maka sinn og elskar fjölskyldulíf. Það er vel hægt að segja að þú sért stórkostlegur elskhugi og þér er ætlað að elska af öllu hjarta en þú mátt alls ekki kveikja á lömpum biturðar ef eitthvað ástarsamband hefur ekki gengið upp. Þú gerir það svo oft að kenna þér um allt sem misferst í fjölskyldu þinni því þér finnst þú eigir að vernda og passa alla í kringum þig.

Spennan er að aukast í lífi þínu, það er eins og það sé að koma hápunktur bíómyndarinnar „Lífið 2018“ og það mun sýna sig innan 90 daga að þú hefur virkilega góð spil á hendi, en í þessu skaltu samt ekki treysta öllum, hafðu pottþétta pappíra ef eitthvað þarf að vera alveg öruggt, því þó þú sért skapaður úr heiðarleika og trausti þá breytist oft allt hratt ef peningar eða einhverskonar völd eru til staðar.

Þú átt eftir að sjá þegar líða tekur á vorið að þú munt koma jafnvægi á og munt finna þetta dásamlega Yin og Yang í lífinu, hreinsa það sem á ekki að vera þar, opnar hurðina og breiðir út faðminn fyrir sólinni sem er að fara að skína svo endalaust í hjarta þitt.

Í þessari tiltekt í lífinu muntu tengjast gömlum vinum betur og endurnýja margt sem þú hélst að væri gleymt og grafið.

Fræg Naut: Aron Einar Gunnarsson fyrirliði íslenska knattspyrnulandsliðsins, Hannes Þór Halldórsson markvörður, Ari Freyr Skúlason landsliðsmaður, Svali Kaldalóns fjölmiðlamógúll, Guðrún Veiga Guðmundsdóttir, rithöfundur og latikokkur, Ellý Ármanns fjölmiðlakona, Friðrik Þór Friðriksson leikstjóri, Valtýr Björn Valtýsson íþróttafréttamaður, Ólafur Ragnar Grímsson forseti, Álfheiður Ingadóttir þingkona, Halldór Laxness, rithöfundur og skáld, Rúnar Freyr Gíslason leikari, Garðar Thor Cortes söngvari, Helga Möller söngkona, Katrín Tanja Davíðsdóttir crossfit-meistari, Nanna Bryndís Hilmarsdóttir söngkona, Pétur Jóhann Sigfússon, Addi Exos dj-snillingur, Davíð Rúnar Bjarnason, boxari.

Setningin er: Ég nota Kúst og Fæjó (Heimilistónar)