Marsspá Siggu Kling – Tvíburinn: Týpan sem þolir ekki nöldur

Elsku Tvíburinn minn, það er svo mikil hreyfing á þér og í öllu sem þú gerir, en þú getur skipt skapi líkt og elding og lætur allt sem er í kringum þig hafa kannski aðeins of mikil áhrif á þig. Ef þér líður illa á staðnum sem þú býrð eða vinnur, skóla og svo framvegis og þér finnst þetta ekki vera eins og þú vilt verðurðu hreinlega skapvondur. En þér líkar umhverfi þitt þá geislarðu líkt og friðarsúlan hennar Yoko Ono, svo veldu af kostgæfni staðsetningar í lífinu þínu.

Þú þarft að skoða af öllum krafti hvað þú þráir og hvað þig langar að verði, tala opinskátt hvað þú vilt að gerist í lífinu þínu því þá festirðu það betur og færir þannig draumana þína nær þér.

Þú ert mjög skapandi og bara til dæmis hvernig þú getur gert einfaldan málsverð að sannkölluðum veislumat svo vel og auðveldlega að það er næstum því óþolandi, og ef þú hefðir jafn mikið sjálfstraust á öðrum sviðum myndi það fleyta þér áfram að þeim takmörkum sem þú vilt ná í lífinu.

Þú ert týpan sem þolir ekki nöldur og þér gæti dottið í hug ef þér finnst ástin ekki henta þér og þinni lífsspeki að gefa henni bara „fingurinn“.

Ef ég ætti að gefa þér eitthvað orð elskan mín eða einhverja hugsun sem er yfir mér núna, þá er það Frelsisstyttan í New York því það er svo mikilvægt að ef þér finnst þú vera njörvaður niður og fastur þá kafnarðu og það má ekki gerast. En það er sama hvað þú ákveður að gera í lífinu þá muntu alltaf lenda á fótunum og þeir sem eru að umgangast þig núna vilja alls ekki vera hent út af vinalistanum þínum. Í frelsinu sem þú uppskerð fylgir samt öryggi, staðfesta og kraftur svo hentu þér út í hamingjuna og hún mun tvíeflas.

Frægir Tvíburar: Ragnar Sigurðsson landsliðsmaður, Örn Árnason leikari, Óli Geir Jónsson plötusnúður, Bjarni töframaður, Hrund Þórsdóttir fréttakona, Össur Skarphéðinsson húmoristi, Johnny Depp leikari, Páll Magnússon fjölmiðlamaður, Kjartan Atli Kjartansson lífsspekúlant, Heimir Hallgrímsson landsliðsþjálfari, Gunnar Einarsson, bæjarstjóri Garðabæjar, Andri Freyr útvarpsmaður og Lýðveldið Ísland, Donald Trump, Þórarinn Þórarinsson blaðamaður, Bjartmar Guðlaugsson, söngvari og snillingur, Jóhanna Heiðdal lögfræðingur.



Setningin þín er: Mitt er valið – Our Choice (Ari Ólafsson)