Curry tryggði meisturunum sigur með flautuþristi

Flautuþristur Steph Curry tryggði Golden State Warriors sigur á Dallas Mavericks í bandarísku NBA deildinni í körfubolta í nótt.

Hinir fjórir fræknu í liði Golden State; Curry, Kevin Durant, Klay Thompson og Draymond Green skoruðu samtals 100 stig í leiknum, sem var nokkuð jafn allan tímann, meistararnir náðu aldrei að hrista heimamenn af sér.

Mavericks höfðu tapað síðustu tveimur viðureignum sínum við Golden State með samtals 45 stigum, en þeir létu þá hafa fyrir sigrinum í nótt. Sigurinn í kvöld var áttundi sigur Golden State á útivelli í röð.

Terry Rozier stal senunni með 20 stigum á 20 mínútum þegar Cleveland Cavaliers mættu Boston Celtics í leik liðanna sem mættust í úrslitum austurdeildarinnar á síðasta tímabili.

Rozier skoraði síðustu átta stigin í fyrsta leikhluta og tryggði Celtics 11 stiga forystu inn í annan leikhluta, og átti svo önnur átta stig í röð um miðbik fjórða leikhluta þegar heimamenn komust í 21 stigs forystu. Svo fór að lokum að Boston vann með fjórtán stigum, 102-88.

Þetta var í fyrsta skipti sem Isiah Thomas snéri aftur til Boston eftir að hafa verið skipt fyri Kyrie Irving fyrir tímabilið og tóku stuðningsmenn Celtics vel á móti honum. Thomas tók þó ekki þátt í leiknum.

Úrslit næturinnar:

Orlando Magic - Houston Rockets 98-116

Philadelphia 76ers - San Antonio Spurs 112-106

Washington Wizards - New York Knicks 121-103

Brooklyn Nets - Minnesota Timberwolves 98-97

Detroit Pistons - Miami Heat 104-111

Boston Celtics - Cleveland Cavaliers 102-88

Chicago Bulls - Toronto Raptors 115-124

Milwaukee Bucks - Indiana Pacers 122-101

Dallas Mavericks - Golden State Warriors 122-125

Denver Nuggets - Phoenix Suns 134-111

Utah Jazz - New Orleans Pelicans 98-108

LA Lakers - Oklahoma City Thunder 96-133