Kuldamet slegin á austurströnd Bandaríkjanna

Mikil frostharka hefur verið á austurströnd Bandaríkjanna síðastliðna daga og hafa kuldamet verið slegin. Í nokkrum borgum á austurströnd Bandaríkjanna og Kanada var um 30 stiga frost í gær.

Rafmagn hefur víða farið af á austurströndinni en í Nova Scotia í Kanada eru tugþúsundir án rafmagns. Þá hafa samgöngur verið í lamasessi vegna veðursins.

Þrjátíu sentímetrar hafa verið af jafnföllnum snjó í New York og í Boston og sáu íbúar í Flórída fyrstu snjókomuna í þrjá áratugi.

Veðurstofa Bandaríkjanna býst við áframhaldandi óveðri og kulda um helgina. Stormurinn sem gengið hefur yfir austurströndina kemur til með að færa sig til norðurs.