Talinn alvarlega slasaður eftir bílveltu

Maður sem kastaðist út úr bíl sínum á Suðurstrandarvegi eftir að bíllinn valt á áttunda tímanum í morgun er talinn alvarlega slasaður.

Nánari upplýsingar liggja ekki fyrir um líðan mannsins samkvæmt lögreglunni á Suðurlandi en þyrla Landhelgisgæslunnar var kölluð út vegna slyssins og flutti manninn á sjúkrahús í Reykjavík.

Samkvæmt upplýsingum frá lögreglu voru aðstæður á vettvangi slyssins fínar. Engin hálka var á veginum og enginn vindur að ráði en vissulega myrkur.