Hluti Bæjarháls lokaður um helgina og fram á mánudagskvöld

Lokað verður fyrir umferð á Bæjarhálsi í Árbæ í báðar áttir milli Bitruháls og Höfðabakka frá klukkan sex á laugardagsmorgun vegna tengingar heimaæðar í hitaveitu Veitna. Búist er við að lokunin standi til klukkan 18 á mánudaginn næsta.

Veitur greina frá því að grafa þurfi þvert yfir götuna og verði reynt eftir fremsta megni að hraða verkinu þannig að lokunin standi ekki lengur yfir en til mánudags.

„Aðkoma að Árbæ og Hálsum verður um hjáleiðir sem verða vel merktar.

Áætlaður verktími á heildarverkinu er fjórar vikur en ekki þarf að loka götum frekar en greint er frá hér að ofan. Gönguhjáleið verður gerð meðfram framkvæmdasvæðinu á meðan á verkinu stendur,“ segir í tilkynningu frá Veitum.