Sir Alex kominn heim af sjúkrahúsi: „Barátta sem hann ætlaði að vinna“

Sir Alex Ferguson hefur verið útskrifaður af sjúkrahúsi og er kominn heim í arm fjölskyldunnar eftir að hafa gengist undir aðgerð vegna alvarlegs heilablóðfalls.

Ferguson er 76 ára og er goðsögn í fótboltasögunni. Hann er sigursælasti knattspyrnustjóri Bretlands frá upphafi og vann 13 Englandsmeistaratitla á 26 árum með Manchester United.

Sir Alex var lagður inn á sjúkrahús í Salford, Manchester laugardaginn 5. maí og gekkst undir aðgerð sama kvöld. Ástand hans er sagt gott miðað við aðstæður og ætlar hann sér að vera mættur aftur í stúkuna á Old Trafford þegar nýtt keppnistímabil í ensku úrvalsdeildinni hefst í Ágúst.

Heimildarmaður The Sun sagði að „það vita allir að Sir Alex er sigurvegari og þetta var barátta sem hann ætlaði sér að vinna. Hann er kominn á fætur og er ánægður að vera kominn af sjúkrahúsinu.“

„Læknarnir eru bjartsýnir og það er stutt í að hann verði mættur aftur í „Leikhús draumanna“.“