Eigandi „Húh-sins“ fullur eftirsjár og segir sér hafa verið hótað

Sá sem sótti um einkarétt á að nota Víkingaklapps „Húh-ið“ á fatnað og drykkjarföng sér eftir því. Hann segist hafa orðið fyrir miklu áreiti út af þessu máli. Segist hafa verið kallaður öllum illum nöfnum og að honum hafi verið hótað. Hann segir myndlistarmanninn Hugleik Dagsson hafa lýst sér á niðrandi hætti í fjölmiðlum og þykir honum miður að Hugleikur hafi farið í fjölmiðla með málið á kostnað æru hans og persónu.

Þetta segir eigandi vörumerkisins „Húh!“, Gunnar Þór Andrésson, í yfirlýsingu sem hann sendi fréttastofu Ríkisútvarpsins vegna málsins.

Forsaga málsins er sú að Hugleikur Dagsson teiknaði mynd af einstaklingi að taka Víkingaklappið margfræga og segja „HÚ!“. Það gerði Hugleikur í kringum Evrópumeistaramót karla í knattspyrnu árið 2016 og ákvað síðar meir að prenta þessa teikningu á boli og selja í vefversluninni Dagsson.com.

Í desember í fyrra fengu aðstandendur vefverslunarinnar skilaboð frá Gunnari þar sem hann tjáði þeim að hann væri með einkarétt á „Húh!“ sem vörumerki þegar kæmi að fatnaði og drykkjarföngum.

Gunnar hafði sóst eftir skráningu árið 2016 og fékk hana samþykkta í september sama ár.

Í yfirlýsingunni sem hann sendi fréttastofu RÚV kemur fram að honum hafi skilist það svo að til að einkaréttur hans haldist hefði hann þurft að koma í veg fyrir notkun annarra á orðmerkinu hvað varðar fatnað og drykkjarvörur.

Hann sagðist hafa sótt um einkarétt á vörumerkinu til að tryggja að annar aðili gæti ekki framleitt nákvæmlega eins vöru og hann og líka til að tryggja að honum yrði ekki bannað að framleiða slíkar vöru á grundvelli einkaréttar.

Hann lætur vera að fjalla ítarlega um fataframleiðslu sína og telur ólíklegt að sú framleiðsla muni líta dagsins ljós héðan í frá í ljósi þess sem undan er gengið.

Gunnar Þór hrósar Hugleiki fyrir að ánafna helming af ágóða hans af sölu HÚ!-bolanna til Krabbameinsfélags Íslands. Vonar hann að félagið muni áfram njóta góðs af sölu bolanna um lengri tíma en hann hefur ákveðið að aðhafast ekki frekar í þessu máli.