34 prósent talað í síma án handfrjáls búnaðar undir stýri

Tæplega helmingur landsmanna hefur notað farsíma undir stýri fyrir símtöl með handfrjálsum búnaði síðasta árið ef marka má könnun MMR.

Samkvæmt henni hafa 34 prósent talað í síma við akstur án handfrjáls búnaðar og þá sögðust sextán prósent hafa notað farsíma til að skrifa og eða lesa sms, tölvupóst eða önnur skilaboð við akstur.

Fram kemur í tilkynningu frá MMR að hlutfall þeirra sem notað hafa farsíma undir stýri fyrir símtöl án handfrjáls búnaðar hefur lækkað með hverri mælingu síðan 2010 og er nú í fyrsta sinn lægra en hlutfall þeirra sem hafa notað hafa síma fyrir símtöl með handfrjálsum búnaði við akstur.

Karlar voru líklegri en konur til að segjast hafa notað síma fyrir símtöl án handfrjáls búnaðar undir stýri. 

Þá voru svarendur í yngsta aldurshópi líklegri en svarendur annarra aldurshópa til að segjast hafa tekið símtöl án handfrjálsbúnaðar, notað leiðsögukort og skrifað og/eða lesið skilaboð undir stýri.