„Svala fékk heilablóðfall: „Gat ekki talað“

Söngkonan Svala Björgvinsdóttir fékk snert af heilablóðfalli fyrr á þessu ári. Þetta kemur fram í samtali hennar við sjónvarpskonuna Völu Matt í þættinum Ísland í dag sem var á dagskrá í lok síðustu viku. Það kom í ljós að Svala hafði einfaldlega keyrt sig út.

„Ég fékk það sem er kallast hverfandi heilablóðfall eða í raun súrefnisskortur upp í heila. Þetta hagar sér í raun eins og heilablóðfall en þú færð í raun enga blæðingu,“ segir Svala en atvikið átti sér stað í Los Angeles.

„Í mínu tilfelli var ég búin að vera frekar slöpp í nokkra daga, með svima og höfuðverk. Ég hélt að ég væri bara að verða veik. Svo lagði ég mig í einhverja tvo tíma og þegar ég vaknaði gat ég ekki talað eða tjáð mig. Þegar ég talaði, talaði ég bara bull. Ég gat ekki sagt nafnið mitt og gat ekki skrifað neitt niður.“

Svala segir að þarna hafa átt sér stað súrefnisskortur í heilanum.

„Maðurinn minn hringir strax til Íslands í frænda sinn sem er hjartalæknir og lýsir þessu fyrir honum. Hann segir strax að þetta sé líklega svona kast. Ég gat alveg hreyft andlitið á mér og hreyft mig venjulega en ég gat bara ekki talað. Þetta stóð yfir í um klukkutíma.“

Hún segist sjálf ekki muna mikið eftir atvikinu.

„Þegar ég hugsa til baka er þetta allt frekar mikið í móki. Ég fór beint upp á spítala og var lögð inn. Þar fór ég í allskonar rannsóknir og þá kom í ljós að ástæðan af hverju ég fékk þetta er að ég er með þrengingu í slagæð í hálsinum,“ segir Svala en hér að neðan má sjá viðtalið við Svölu.