Geta beðið átekta uns leigutíminn rennur út

Fjármálaráðuneytið bendir á að í stað þess að ríkið kaupi húsgrunn á leigulóð ríkisins við Þingvallavatn á 70 milljónir króna eins og Þingvallanefnd vildi sé hægt að bíða þar til leigusamningurinn rennur út eftir fjögur ár og fá þá lóðina til baka.

Eins og áður hefur verið sagt frá í Fréttablaðinu ákvað þáverandi Þingvallanefnd í lok október í fyrra á síðasta fundi sínum að neyta forkaupsréttar og ganga inn í kaup á uppsteyptum húsgrunni á Valhallarstíg 7. Grunnurinn er að nýju húsi sem eigendur lóðarinnar hófust handa við skömmu fyrir hrun og koma átti í stað eldri bústaðar. Þeir voru með 70 milljóna króna tilboð í höndunum.

Vegna stjórnarskipta tafðist afgreiðsla málsins. Þegar málið barst loks til samþykktar í fjármálaráðuneytinu var svarið þar að ekki væru fyrir hendi fullnægjandi forsendur til  að hefja viðræður um kaup á lóðarréttindunum og húsgrunninum eins og Þingvallanefnd óskaði eftir.

Fréttblaðið óskaði nánari skýringa á afstöðu fjármálaráðuneytisins. Elva Björk Sverrisdóttir, upplýsingafulltrúi ráðuneytisins, segir um helstu ástæðurnar að í fyrsta lagi hafi ríkissjóður ekki neytt forkaupsréttar. Það þýðir einfaldlega að kerfið var of svifaseint og missti forkaupsréttinn. Elva tiltekur einnig að upphaflegur tilboðsgjafi hafi dregið tilboð sitt til baka.

„Fyrir liggur að fjárhæðin sem hér um ræðir er umtalsvert hærri en í öðrum sambærilegum kaupum sem ríkið hefur staðið fyrir í þjóðgarðinum á síðustu árum, en þau nema alls rúmlega 113 milljónum króna vegna átta sumarhúsa,“ segir áfram í svari upplýsingafulltrúans.

Þá nefnir Elva Björk að fyrir liggi að stutt sé eftir af lóðarleigusamningi fyrir Valhallarstíg 7, eða fjögur ár. „Ríkissjóður er eigandi landsins en að leigutíma liðnum mælir leigusamningurinn fyrir um að lóðarréttindin falli aftur til Þingvallanefndar án sérstakrar uppsagnar,“ undirstrikar upplýsingafulltrúi fjármálaráðuneytisins.