Nauðgað af manni sem hún bað um að hjálpa sér eftir nauðgun

Fimmtán ára stúlku var nauðgað tvisvar af tveimur mönnum í Birmingham í Bretlandi á þriðjudagskvöldið. Eftir að henni hafði verið nauðgað stöðvaði hún bíl og bað ökumann hans um hjálp. Eftir að hún settist upp í bílinn hjá manninum nauðgaði hann henni einnig. Lögreglan leitar nú beggja mannanna.

Þeim hefur verið lýst sem asískum og á þrítugsaldri.

Samkvæmt frétt Sky News var stúlkan á lestarstöð með vini sínum, en hún varð viðskila við hann og leidd á brott af manni sem nauðgaði henni. Þá yfirgaf hún lestarstöðina, stöðvaði fyrsta bílinn sem hún sá og bað ökumanninn um að hjálpa sér.



Hann sagði henni að setjast upp í bílinn og nauðgaði hann henni einnig.

Lögregluþjónar skoða nú myndbandsupptökur af svæðinu og hafa beðið möguleg vitni að stíga fram.