Núna klukkan 14 var þjóðvegi 1 milli Seljalandsfoss og Víkur lokað vegna óveðurs. Fyrr í dag var þjóðveginum frá Skeiðarársandi að Jökulsárlóni lokað, einnig vegna veðurs.
Mikið hvassviðri er nú á Suður-og Suðausturlandi en í morgun var afar hvasst norðvestan til á landinu og á Vestfjörðum.
Nú síðdegis verður svo hvassast undir Eyjafjöllum og í Öræfum og er því brugðið á það ráð að loka veginum þar sem búast má við snörpum vindhviðum, allt að 45 metrum á sekúndu, og er litla breytingu að sjá í veðrinu allt til morguns að því er fram kemur á vef Vegagerðarinnar. Þá er hætt við sandfoki á Skeiðarársandi.
Vegfarendur eru svo hvattir til að hafa varann á þegar farið er um fjallvegi þar sem víða hefur snjóað eða er spáð snjókomu.
Færð og aðstæður á vegum eru annars þessar:
Það er éljagangur og krapi á Fróðárheiði en hvasst er á Snæfellsnesi og sandfok innan við Ólafsvík.
Á Vestfjörðum er víða hvassviðri og éljagangur, slydda eða snjókoma. Steingrímsfjarðarheiði er lokuð. Ófært er á Hrafseyrarheiði og Dynjandisheiði. Krap er á Hálfdáni og á köflum á norðanverðum fjörðunum, þar jafnvel á láglendi.
Hálkublettir eru á Öxnadalsheiði, og éljagangur.
Hálkublettir eru á Möðrudalsöræfum og víðar á Austurlandi, snjóþekja á Fjarðarheiði og hálka á Oddsskarði.
Þjóðvegi 1 lokað milli Seljalandsfoss og Víkur
Tengdar fréttir
Lokað á milli Kirkjubæjarklausturs og Jökulsárlóns
Þá má búast við að þjóðveginum undir Eyjafjöllum verði lokað seinna í dag.
Vindhviður náð allt að 50 metrum á sekúndu
Mikið hvassviðri gengur nú yfir landið norðvestanvert og Vestfirði og hafa hviður á Gemlufallsheiði á Vestfjörðum náð allt að 50 metrum á sekúndu að sögn Helgu Ívarsdóttur, vakthafandi veðurfræðings á Veðurstofu Íslands.
