Vala Matt táraðist næstum því yfir sósu Evu Lauf­eyjar

Í Íslandi í dag á Stöð 2 í kvöld fer Vala Matt og heimsækir sjónvarpskokkinn hana Evu Laufeyju og fékk að skoða ísskápinn hennar en Eva Laufey hefur alveg slegið í gegn ásamt Gumma Ben í sjónvarpsþáttunum Ísskápastríðið.

Þar var sannarlega ísskápur eins og á flottu sveitasetri úti á landi, enda býr Eva Laufey á Akranesi. Svo kenndi Eva Völu hvernig hún gerir kjúklingarétt með svo himneskri sósu að Vala næstum táraðist. 

Kjúklingaréttur með beikon rjómasósu

2 msk ólífuolía

6 sneiðar beikon, smátt skorið

10 sveppir, smátt skornir

1/2 laukur, smátt skorinn

2 msk fersk steinselja, smátt söxuð

2 msk ferskt timjan, smátt skorið

600-700 g kjúklingakjöt, t.d. bringur

1/2 kjúklingakrafts teningur

350 ml rjómi

Salt og nýmalaður pipar eftir smekk



Aðferð:

Hitið olíuna við vægan hita á pönnu. Steikið beikon, sveppi og lauk. Saxið ferskar kryddjurtir og bætið þeim út á pönnuna. Hellið rjómanum saman við og leyfið þessu að malla við vægan hita í 4-5 mínútur, kryddið með kjúklingakrafti, salti og pipar.

Skolið kjúklingakjötið vel, skerið í litla bita og leggið kjötið í eldfast mót. Kryddið kjötið með salti og pipar.

Hellið rjómasósunni yfir kjúklinginn og bakið í ofni við 180* C í 30-35 mínútur. Gjarnan má setja smá parmesan ost yfir áður en sett er í ofninn. Berið réttinn fram til dæmis með hrísgrjónum og fersku salati. Sósan passar vel með öllu kjöti og einnig fiski.