Snýr aftur eftir hnífaárás innbrotsþjófa

Petra Kvitova er í fyrsta sinn farin að æfa með tennisspaða í höndinni eftir alvarlega hnífaárás sem átti sér stað á heimili hennar í Tékklandi í lok síðast árs.

Innbrotsþjófur stakk Kvitovu, sem var áður í efsta sæti á heimslistanum í tennis, í handlegginn en Kvitova varð hlaut skaða í sinum og taugum.

„Ég vona að þessi mynd geri ykkur jafn hamingjusöm og mig,“ skrifaði hún við mynd sem hún birti af sér á Instragram og má sjá hér fyrir neðan. „Ég er komin aftur á tennisvöllinn og byrjuð að slá.“

Opna franska meistaramótið í tennis hefst 28. maí og hefur Kvitova skráð sig til leiks en óvíst er hvort hún muni taka þátt í mótinu.