Síðustu 20: Þú gagnrýnir ekki Dúlluna okkar

Stuðningsmannafélagið Kári setti fram óviðeigandi færslu á Twitter-síðu sinni um Sigurð Svein Þórðarson, Sigga Dúllu, í gær eins og fjallað var um á Vísi.

Sjá einnig: Stuðningsmenn Fjölnis fá á baukinn fyrir niðrandi færslu um Sigga Dúllu

Málið var tekið til umfjöllunar í Síðustu 20 á Stöð 2 Sport í gær en þar voru þáttastjórnendurnir Hörður Magnússon og Tómas Þór Þórðarson sammála um að framkoman væri ólíðandi.

„Þetta er til háborinnar skammar og auðvitað bara hugleysingjar sem gera svona í skjóli nafnleyndar,“ sagði Tómas Þór í þættinum í gær.

Tómas Þór sagði að Káramenn hefðu gert þau reginmistök að gagnrýna einhver sem væri með „okkar“ fyrir aftan nafnið sitt en Siggi Dúlla er bæði liðsstjóri Stjörnunnar og íslenska karlalandsliðsins í fótbolta.

„Hann er dúllan okkar,“ sagði Tómas en umræðuna má sjá alla í spilaranum hér fyrir ofan.