Það skýrðist eftir leik hvers vegna Viðar Örn var ekki valinn

Heimir Hallgrímsson, landsliðsþjálfari Íslands, var spurður út í liðsuppstillinguna í dag þar sem aðeins einn framherja var að finna. Ísland spilaði leikkerfið 4-5-1 með Gylfa Þór Sigurðsson í frjálsu hlutverki fyrir framan Aron Einar Gunnarsson og Emil Hallfreðsson. Í fremstu víglínu var Alfreð Finnbogason.

Heimir benti á það af hverju þeir þéttuðu miðjuna.

„Það sýndi sig í leiknum af hverju við vorum að þessu. Við lokuðum vel á þá í Króatíu og enn betur í kvöld,“ sagði Heimir. Hann minntist á færi sem Mario Mandzukic fékk í síðari hálfleiknum en mundi annars ekki eftir opnu færi gestanna. Frekar en blaðamenn.

„Þegar þú spilar á móti svona góðu liði þarftu að reyna að neutralisera það,“ sagði Heimir. Íslenska liðið mætti aldrei lenda í þeirri stöðu að vera undirmannað á svæðum á vellinum, hvað þá á miðjunni. 

„Það er ástæðan fyrir því að við fórum úr tveggja framherja kerfi í eins framherja kerfi.“

Sjá einnig: Viðar Örn ætlar ekki að leggja árar í bát

Aðeins þrír framherjar voru valdir í hópinn fyrir leikinn, þeir Alfreð Finnbogason, Jón Daði Böðvarsson og Björn Bergmann Sigurðarson. Fjarvera markahæsta leikmanns ísraelsku deildarinnar, Viðars Arnar Kjartanssonar, vakti athygli og þótti mörgum skrýtin enda hafði hann verið einn fjögurra framherja í leikjunum á undan.

Veltu sumir fyrir sér hvort verið væri að refsa Viðar Erni fyrir dómgreindarleysi í aðdraganda fyrri leiksins gegn Króatíu í nóvember. Enginn fótur var fyrir því.

Ástæðan fyrir því að þrír framherjar voru valdir í hópinn var sú að Heimir ætlaði aðeins að spila með einn í þessum leik, eða hvað?

„Akkurat,“ var svar Heimis á fundinum.

Bað Heimir fjölmiðlamenn afsökunar, í gríni þó, að hafa ekki skýrt nánar frá því hvers vegna aðeins þrír framherjar hefðu verið í hópnum.

Ísland mætir Finnlandi í næsta leik sínum 2. september en leikið verður í Tampere. Í framhaldinu koma Úkraínumenn í heimsókn á Laugardalsvöllinn.

Má telja líklegt að Viðar Örn verði aftur kominn í landsliðshópinn fyrir þá leiki enda má búast við því að Heimir fari aftur í hefðbundið 4-4-2 leikkerfi sem hefur reynst landsliðinu svo vel undanfarin misseri.