Lestrarhestar stórir og smáir

Hann fékk bók en hún fékk nál og tvinna segir í texta lagsins „Hátíð í bæ“ eftir Ólaf Gauk í samræmi við tíðarandann þegar textinn var saminn. Í dag myndum við alveg eins syngja „hún fékk bók en hann fékk nál og tvinna“ enda stelpur og konur ekki minna áhugasamar um bóklestur en drengir, nema síður sé, og piltarnir margir hverjir lagtækir með nál og tvinna.

Lestur er undirstaða allrar menntunar og það fer vel á því, í miðju jólabókaflóðinu, að minna foreldra og forráðamenn og ömmur og afa á að gleyma ekki að lesa fyrir og með börnunum um jólin.

Lesturinn þarf ekki að vera á sama formi og á skólatíma, það er tilvalið að skiptast á að lesa upphátt úr skemmtilegum bókum, jafnvel með leikrænum tilburðum. Muna bara að velja bækur sem hæfa aldri og áhugasviði þess sem les. Unglingarnir geta til dæmis lesið fyrir ömmu og afa og öfugt, litlu börnin fyrir eldri systkini og mamma og pabbi hvort fyrir annað því við fullorðna fólkið erum jú fyrirmyndir barnanna þegar kemur að lestri.

Það má stofna fjölskyldubókaklúbb og láta alla segja stuttlega frá einni bók eða allir lesa sömu bókina og ræða hana svo sín á milli. Lestrarkeppni fjölskyldunnar getur líka verið góð hugmynd eða að brydda upp á einhverju öðru skemmtilegu sem tengir kynslóðir saman í lestri.

Hvernig væri svo að lesa uppskriftir að uppáhalds jólasmákökunum áður en þeim er stungið í ofninn og textana í öllum skemmtilegu jólalögunum áður en farið er á jólaball. Svo má lesa á götuskilti þegar verið er að keyra út kort og pakka, æfa sig að skrifa bréf til Sveinka og auðvitað lesa á jólapakkana.

Það er um að gera að nota hugmyndaflugið til að finna skemmtilegar leiðir til að örva börn á öllum aldri til lesturs.

Á vef Heimilis og skóla, www.heimiliogskoli.is, má finna jólalestrarbingó sem er skemmtilegt fyrir allan aldur, þar má einnig finna Læsissáttmála Heimilis og skóla og góð ráð til foreldra varðandi stuðning við lestur. Á vef Menntamálastofnunar, www.mms.is, má finna áhugaverðan leik, Jólasveinalestur, sem er samvinnuverkefni með Félagi fagfólks á skólasöfnum og KrakkaRÚV.

Eigum saman notaleg lestrarjól með fjölskyldunni.

 

Höfundur er verkefnastjóri hjá Heimili og skóla.