Jólaspá Siggu Kling – Hrúturinn: Réttlætið skiptir þig öllu máli

Elsku Hrúturinn minn, þetta hefur verið mjög litríkt ár með miklu fleiri góðum en slæmum punktum en það er í eðli hugans að draga frekar að sér erfiðleikana sem hindra mann heldur en það dásamlega sem hefur gerst í kringum þig. Þú býrð yfir brennandi þrá til að gera hlutina sérstaka og þar af leiðandi finnst þér þú tapa ef það gengur ekki alveg 100%.

Þú ert svo stoltur og vilt ekki að aðrir viti þegar illa gengur, ég las einhvers staðar að 90% af fólki er alveg skítsama hvernig gengur hjá þér, og hin 10% eru bara svolítið ánægð með að þér gangi ekki vel. Svo haltu bara því fyrir þig sem þú vilt ekki að allir séu að tala um, en treystu þínum innsta hring, þess vegna heitir hann innsti hringur.

Það er að koma dásamlegur tími í desember, sérstaklega þegar tunglið er fullt því það er fullt tungl í nautsmerkinu sem gefur ástarplánetuna Venus, svo góð ást verður betri, en vond ást getur sprungið. Og það er jákvætt því það er tilgangur ástarinnar að leiðrétta og láta mann finna hina einu sönnu hamingju.

Þótt þú búir yfir því að vera svona sterk manneskja þá er alltaf hollt að geta grátið stundum og eins og vinkona mín sagði; ef maður grætur, Sigga mín, þá fær maður ekki krabbamein. Þetta er alls ekki vísindalega sannað en ég trúi því samt, svo leyfðu þér bara að gráta, en bara stutta stund til að losa um spennu því að þessi vetur er þinn tími og þú stendur hvort sem er uppi sem stoltur sigurvegari.

Það sem getur orðið einkennandi fyrir þig á næstu mánuðum er að þú ert mjög skapmikill og réttlætið skiptir þig öllu máli, en láttu þér verða það að lexíu að telja upp að tíu áður en þú segir eitthvað sem verður ekki aftur tekið, því ef þú sendir reiðina út þá færðu hreina reiði til baka. Notaðu þessa orku í að finna betri leið til að sigra það sem hrjáir þig og þú þarft að vera svolítið sniðugur og fá fólk á þitt band og sérstaklega fáðu það fólk sem fer í taugarnar á þér með þér í lið.

Frægir Hrútar: Hera Björk Þórhallsdóttir söngkona, Silvía Lovetank listamaður, Marta María Jónasdóttir á Smartlandi, Björgvin Halldórsson söngvari, Kári Stefánsson vísindamaður, Vigdís Finnbogadóttir, fyrrverandi forseti, Hugh Hefner, Birgitta Jónsdóttir pírati, Anna Svava Knútsdóttir leikkona, Ólöf Erla, grafískur hönnunarsnillingur, Elton John söngvari, Salka Sól súperdrottning, Þóra í Atlanta, Sigmar Guðmundsson sjónvarpsmaður, Berglind Pétursdóttir, Steinunn Jónsdóttir, söngkona AmabAdamA, Þórhallur Þórhallsson uppistandari, Kristín Þorsteinsdóttir, aðalritstjóri 365 miðla, Alda í Handy pandy, naglalistakona, Vala Grand, Hjálmar Forni listamaður, Jakob Bjarnar Grétarsson, Elín Björnsdóttir, fyrirlesari og kraftaverkakona.

Skilaboðin til þín eru frá okkar flotta Hrúti, henni Sölku Sól: Taktu lífið ekki of alvarlega, bara – Hossa Hossa(Amabadama)