MDMA-sölumaðurinn í felum

Lögreglan á höfuðborgarsvæðinu hefur ekki haft hendur í hári ungs manns sem grunaður er um að hafa selt tveimur fimmtán ára stúlkum fíkniefnið MDMA í síðustu viku. Stúlkurnar fundust meðvitundarlausar á tröppum við hús á Grettisgötu á fimmtudag. Þær eru á batavegi en annarri var .

Lögregla gerði húsleit í húsi við Grettisgötu á laugardag og hefur endurtekið komu sína í húsið í þeirri von að hafa uppi á ungum manni sem talinn er búa þar. Kom lögregla við í húsinu síðast í morgun.

Lögregla óttast að hann hafi selt fleirum MDMA en auk þess að vera ólöglegt fíkniefni mun efnið sem maðurinn hefur til sölu vera eitrað.

Stúlkurnar tvær voru hætt komnar þegar þær fundust og lagðar inn á gjörgæslu. Talið er að þær hafi misst meðvitund eftir að hafa tekið inn fíkniefnið MDMA. Þá leikur grunur á að stúlkurnar hafi einnig tekið önnur lyf. 

Stúlk­urn­ar komust báðar til meðvit­und­ar en önn­ur þurfti að fara í önd­un­ar­vél á gjör­gæslu og komst til meðvit­und­ar dag­inn eft­ir að hún fannst.

Guðmundur Páll Jónsson, lögreglufulltrúi á höfuðborgarsvæðinu, hvetur manninn til að gefa sig fram. Hann sé greinilega í felum. Þá útilokar lögreglan ekki að annar maður hafi komið við sögu við sölu efnanna og er hans leitað sömuleiðis.

„Þeir eru hugsanlega tveir í þessu,“ segir Guðmundur. Ekki liggur fyrir nákvæmt magn efna sem fannst við húsleit í íbúðinni á laugardaginn. Það var sent í greiningu í morgun. Magnið mun þó ekki vera verulegt en þó eitthvað af fíkniefnum og lyfjum.