Kim Kardashian gat ekki svarað þessari spurningu og drakk því ógeðsdrykk

Í spjallþættinum Late Late show með Bretanum James Corden er oft á dagskrá liðurinn Spill Your Guts or Fill Your Guts sem gengur út á það að maður á annað hvort að svara erfiðri spurningu eða borða einhvern algjöran viðbjóð.

Á dögunum var raunveruleikastjarnan Kim Kardashian gestur hjá Corden og tók hún þátt í dagskráliðnum með skemmtilegri útkomu.

Corden spurði Kim mjög persónulegra spurninga og meðal annars í tengslum við systkini hennar. Hún var meðal annars beðin um að raða systkinum sínum í röð frá best klædda til verst. Það kom ekkert sérstaklega vel út fyrir Khloé Kardashian.

Kim sagði áhorfendum frá því að eiginmaður hennar Kanye West sofni út um allt og í hvaða aðstæðum sem er.

„Þetta getur verið mjög vandræðalegt þegar hann sofnar til að mynda í foreldraviðtali,“ segir Kim Kardashian.

James Corden spurði Kim hvort Khloé Kardashian og Kylie Jenner væru óléttar og var hún ekki tilbúinn til að svara því. Raunveruleikastjarnan varð því að drekka sardínuhristing sem var henni ekki að skapi eins og sjá má hér að neðan.