„Hann er að hóta öllum í fjölskyldunni minni og það er ekki gert neitt“

„Þetta er mjög veikur einstaklingur og hann er ekki að fá hjálp. Það er bara sagt að hann sé ekki nógu veikur. Það er bara kjaftæði.“

Svona lýsir Eva Riley Stonestreet manninum sem hefur áreitt hana svo mánuðum skiptir. Í myndbandi sem hún birti í gærkvöldi, og sjá má hér að neðan, lýsir hún samskiptum sínum við manninn sem hefur sent henni hundruð dónalegra og hótandi skilaboða.

Alltaf þegar hún hafi reynt að loka á hann á samfélagsmiðlum hafi hann búið til aðgang undir nýju nafni og haldið áfram. Hann notar myndir af öðrum einstaklingum á Facebook-prófílreikning sinn og hvetur Eva þá sem þekki fólkið á myndunum til að láta það vita.

Reikningarnir sem hann hefur búið til skipta tugum. Þegar það hefur ekki gengið hefur hann sent fjölskyldumeðlimum Evu og vinum „ógeðsleg“ skilaboð.

Kærði en taldi hann fá hjálp

Eva kærði manninn til lögreglu á sínum tíma en þegar systir mannsins taldi henni trú um að maðurinn væri kominn á geðdeild og fengi aðstoð dró hún kæruna til baka.

Það fyrsta sem hann gerði þegar hann kom út af deildinni er að fara inn á Facebook-reikning pabba síns og „læka“ mynd af henni.

Hún óskar eftir aðstoð fólks við að hafa uppi á því fólki sem maðurinn talar um í skilaboðunum til sín svo hægt sé að koma því í skilning um að hann þurfi að leita sér aðstoðar.

„Hann er að hóta öllum í fjölskyldunni minni og það er ekki gert neitt. Það er ekki búið að gera neitt og það mun ekki vera neitt gert.“

Myndband Evu, sem farið hefur víða, má sjá hér.

Rétt er að undirstrika að nöfn og andlit á prófílunum sem maðurinn sendir skilaboðin frá eru ekki af manninum sjálfum heldur ótengdu fólki. Eva hvetur fólk sem kannast við andlit þeirra sem maðurinn notar til að láta það vita.

Uppfært klukkan 13:50

Myndbandið hefur verið fjarlægt.