Engar áherslubreytingar fylgja nýjum eigendum Domino's

Domino’s í Bretlandi (Domino’s Pizza Group, DPG) hefur eignast ráðandi hlut í Domino’s á Íslandi, í Noregi og Svíþjóð. Kaup Bretanna á hlut íslenskra fjárfesta í félögunum gengu í gegn síðari hluta aprílmánaðar. Engar áherslubreytingar í rekstri Domino’s hér á landi munu fylgja nýju eigendunum, að sögn forstjóra Domino’s á Íslandi.

Fram kemur í nýbirtu uppgjöri DPG fyrir fyrstu sex mánuði ársins að félagið keypti tveggja prósenta hlut í Domino’s á Íslandi þann 19.  apríl síðastliðinn fyrir 1,28 milljónir punda eða 174 milljónir króna. Eignaðist DPG þar með ráðandi 51 prósents hlut í Domino’s hér á landi. Seðlabanki Íslands þurfti að leggja blessun sína yfir kaupin.

Á sama tíma keypti breska félagið 51 prósents hlut í rekstri Domino’s í Noregi og Svíþjóð af íslensku keðjunni. Var kaupverðið um 13,7 milljónir punda. Eignarhlutur DPG fór þar með úr 20 prósentum í 71 prósent.

Breska félagið keypti sig fyrst inn í rekstur Domino’s á Íslandi, í Noregi og Svíþjóð í júní í fyrra. Um þrjú ár eru síðan íslenskir fjárfestar, undir forystu Birgis Þórs Bieltvedt, opnuðu fyrsta pitsustaðinn í Noregi og enn styttra er frá því að fyrsti staðurinn í Svíþjóð var opnaður.

Fram kemur í uppgjörinu að sala Domino’s hér á landi hafi aukist um 15,2 prósent á fyrstu sex mánuðum ársins. Telja stjórnendur DPG að fjölga megi pitsustöðum keðjunnar hér um 37 prósent, eða átta staði, en þeir eru nú 22.

Birgir Örn Birgisson, forstjóri Domino’s á Íslandi, segir að horft sé til langs tíma. „Ísland er að byggjast og stækka. Við höfum verið hverfispitsustaðurinn og nú eru að byggjast upp ný hverfi. Við munum stilla okkur þangað inn. Hversu hratt það gerist fer bara eftir skipulaginu á hverjum tíma og hversu vel það gengur að byggja upp.“