Júlíspá Siggu Kling - Bogmaðurinn: Þú ert flinkasta manneskjan í svo mörgu

7. júlí 2017 09:00

Elsku Bogmaðurinn minn. Hvort sem þú veist það eða ekki ertu eins og íslenska fánastöngin, stoltur, litríkur og eitthvað sem skiptir svo miklu máli. Að sjálfsögðu hafa verið ömurlegar flækjur í lífi þínu, en þú ert akkúrat sú týpa sem kann að leysa þær og breyta í fegurð.

En það skiptir miklu máli hvernig þú talar, svo breyttu orðum þínum og líf þitt breytist. Hentu út neikvæðninni sem er alveg pottþétt frá uppeldi þínu eða lífsreynslu. Þú hefur rosalegan styrk og kraft sem getur verið undirstaða að yndislegu lífi, þú hefur svo dýrmæta vináttu að bjóða og deilir tilfinningum þínum af miklum krafti.

Í gamalli sögu segir af tvíburum í Bogmanninum sem báðir lentu í fangelsi. Það er svo mikilvægt að þú sért manneskja eins og annar þeirra sem sá bara stjörnurnar, ákvað að ekkert skyldi stoppa hann í að líða vel og breyta lífi annarra jákvætt, því hann hafði lært af sínum mistökum. En hinn, fæddur fimm mínútum seinna, sá bara biturð og neikvæðni; allir höfðu verið vondir við hann og hann vildi bara hefna sín.

Þú ræður að sjálfsögðu hvort þú dreifir tilfinningum sem breyta lífi annarra á jákvæðan hátt eða tilfinningum sem hafa neikvæð áhrif á þig og aðra. Þú ert flinkasta manneskjan í svo mörgu, en þú þarft að setja allt jafnt á vogarskálarnar til að dæma engan, því ef þú trúir að þú sért dómarinn þá skaltu allavega hafa mildi og hlýju að leiðarljósi í því sem þú gerir.

Þú getur samt haft svo mikil áhrif á fólk í kringum þig og getur látið öðrum líða eins og þeir séu einstakir. Það er mikilvægt þú veitir þeim athygli hvort sem öðrum í kringum þig þykir það fólk vera mikilvægt eða ekki.

Þú færð ótal tækifæri upp í hendurnar á þessu sumri og í þessum krafti er mikilvægt að þú leikir við þá í kringum þig sem elska lífið sjálft. Þú hefur hæfileika til að elska og gefa ef þú ert jákvæði Bogmaðurinn. En ef þú átt maka sem stjórnar þér og brýtur þig niður, þá brýst fram allt það versta í þér, kannski ekki endilega núna en seinna. Þótt þú elskir frelsið, þá er best að gefa eftir í ástinni því annars verða sífelldir árekstrar.

Þú ert svo tilfinningaríkur að þú þarft að elska af tilfinningu og skilyrðislaust. Þig langar til að hjálpa öllum heiminum en byrjaðu frekar á sjálfum þér og þeim sem eru næst þér. Það setja svo margir traust á þig og fólki finnst þú svo miklu merkilegri en þér sjálfum finnst þú nokkurn tímann. Svo ef þú stendur á krossgötum núna, sem er mjög líklegt, skoðaðu þá tengslanetið í kringum þig, það er sterkara en þig grunar.

Það skiptir þig miklu máli að vera í formi. Ef þér finnst eins og að leti, sem er algjör óvinur þinn, sé allsráðandi og að þú fáir ekki þá hreyfingu sem þú þarfnast, þá verður hugur þinn drungalegur og Bogmaðurinn fær ekki að brjótast út eins og hann vill. En þú ert eldfjall svo haltu áfram að vera tignarlegt eldfjall, en láttu samt engan hræðast þig!

Mottóið þitt er: Byrjið og hugurinn mun hressast og byrjið og verkin munu blessast.

Ást og friður, Sigga Kling

Frægir Bogmenn: Ingvar E. Sigurðsson leikari, Björgvin Franz Gíslason leikari, Edda Heiðrún Backman leikkona, Regína Ósk Óskarsdóttir söngkona, Sigrún í Gyðja Collection, Steindi, Bryndís Ásmundsdóttir, leik- og söngkona, Jóhanna Vilhjálmsdóttir, fjallkona og leikkona, Logi Bergmann Eiðsson sjónvarpsmaður, Jói á Fabrikkunni, Sigga Dögg kynfræðingur, Hemmi, hársnillingur á Módus, Lovísa, hönnuður hjá Kjólar og konfekt.

Stjörnuspá Siggu Kling

Mest lesið

Fleiri fréttir

Mest lesið

Fleiri fréttir

Mest lesið

Tarot dagsins