Ekkert nám við Hússtjórnarskólann á Hallormsstað næsta vetur

Ekki verður boðið upp á nám við Hússtjórnarskólann á Hallormsstað næsta vetur þar sem námið þykir ekki vera innan ramma aðalnámskrár framhaldsskóla.

Í tilkynningu frá skólanefnd skólans kemur fram að allir starfsmenn skólans hafi látið af störfum og nemendur sem hafi óskað eftir skólavist næsta vetur hafi verið látnir vita að ekki verði hægt að sinna þeim.

„Mennta- og menningarmálaráðuneytið tilkynnti skólanum í janúar sl. að ekki yrði af áframhaldandi stuðningi ráðuneytis við skólann sökum nemendafæðar og rekstrarsamningi væri því sagt upp. Í kjölfar þess var öllum starfsmönnum skólans sagt upp. Ráðuneytinu var send greinargerð um starfsemina í kjölfar fundar með embættismönnum ásamt með tillögum að útvíkkun starfseminnar sem unnar voru af hálfu sjálfseignarstofnunarinnar. Í liðinni viku tilkynnti ráðherra að engin breyting hefði orðið á afstöðu ráðuneytisins; námið eða hugmyndir að útvíkkun starfseminnar féllu ekki að Aðalnámskrá framhaldsskóla og kröfum sem settar eru í námsbrautalýsingum en það væri engu að síður í höndum stjórnar sjálfseignarstofnunarinnar að ákveða hvert skyldi stefna. Forsenda þess að skólinn hafi möguleika á áframhaldandi stuðningi ráðuneytis er að námsbrautalýsing uppfylli skilyrðir aðalnámskrár  og að skólinn fengi endurnýjaða viðurkenningu sem einkaskóli í framhaldi af því.

Þetta er mikið áfall fyrir starfsmenn og skólanefnd Hússtjórnarskólans á Hallormsstað enda ljóst að í námskrá er tekið fyrir hefðbundið hússtjórnarnám sem hefur verið stutt hagnýt námsbraut og hefur nýst nemendum til eininga í öðru námi í framhaldsskólum . Sömuleiðis fækkar enn þeim möguleikum sem nemendur, sem hafa áhuga á öðru en hefðbundnu bók- eða tækninám, hafa úr að velja,“ segir í tilkynningunni.

Starfræktur frá 1930

Hússtjórnarskólinn á Hallormsstað hefur verið starfræktur frá árinu 1930. „Ávallt hefur verið boðið upp á heildstætt og hefðbundið nám í hússtjórnargreinum sem hefur þróast í takt við tíðarandann. Um er að ræða matreiðslu, hannyrðir, framreiðslu auk bóknáms í afmörkuðum greinum. Á síðustu árum hefur skólinn, í auknum mæli og með góðum árangri, sinnt nemendum með sérþarfir, aðlagað námsefni og aðstæður og þannig tekið þátt í að veita þeim aðgang að fjölbreyttara námsframboði,“ segir í tilkynningu skólanefndar.