Fæðingarstofa í Reykjavík

Við vildum fjölga valkostum fyrir fæðandi konur. Ekki síst vegna aukinnar eftirspurnar kvenna úti á landi eftir heimafæðingum í Reykjavík. Þær sóttust eftir þeirri samfelldu þjónustu sem við veitum. Svo kom líka í ljós að það var heilmikil þörf fyrir svona aðstöðu fyrir konur á höfuðborgarsvæðinu.“ Þetta segir Hrafnhildur Halldórsdóttir ljósmóðir um fæðingarstofu Bjarkarinnar sem opnuð var fyrir fáum dögum í Síðumúla 10 og hún og Arney Þórarinsdóttir reka.

Fyrsta barnið sem fæddist í fæðingarstofunni kom í heiminn aðfaranótt laugardagsins 6. maí. Það var frumburður foreldra sinna. Þær hika sem sagt ekkert við að taka á móti þeim. „Nei, ef meðgangan er eðlileg og konan er hraust þá er ekkert því til fyrirstöðu. Við byggjum starf okkar á rannsóknum og vitum að útkoman er alveg jafn góð í heimafæðingum og á fæðingarheimilum eins og á spítölum. Jafn góð fyrir börnin og aðeins betri fyrir konurnar.“

Hrafnhildur og Arney hófu samstarf árið 2009, nýkomnar úr ljósmæðranámi. Þá stofnuðu þær Björkina ljósmæður og byrjuðu með fæðingarundirbúningsnámskeið, síðan bættust heimafæðingar við árið 2010 og eftirfylgni í sængurlegu heima. Fæðingarstofan er framhald af því. „Sums staðar er þröngt á heimilum, pör búa kannski heima hjá foreldrum annars þeirra eða nokkur pör saman og ekki er aðstaða til að fæða þar,“ lýsir Hrafnhildur og segir miðað við að tvær ljósmæður sinni hverri fjölskyldu frá 34. viku meðgöngu.

Varla geta þó konur utan af landi dvalið hjá þeim vikum saman? „Nei, þær eru hjá ættingjum og vinum meðan þær dvelja hér syðra en hentar kannski ekki að fæða þar. Auðvitað væri æðislegt ef við værum með stað þar sem þær gætu dvalið. Hann kemur kannski seinna.“



Björkin er með samning við Sjúkratryggingar Íslands, að sögn Hrafnhildar. „Við sinnum bara hraustum konum sem eru í eðlilegri meðgöngu og okkur hefur gengið mjög vel. Stundum þurfum við að leita á Landspítalann og erum í góðu samstarfi við hann.“