Heimsfrægir í Armeníu

„Jú, það höldum við, það hefur allavega enginn komið fram og leiðrétt þetta. Við töluðum við ÚTÓN og þeir staðfestu þetta og síðan voru allir úti að segja þetta við okkur. Við vissum ekki neitt og vorum ekkert að pæla í þessu en síðan fannst okkur þetta bara svo kúl þegar allir voru að segja þetta við okkur. Ég kaupi þetta eiginlega ekki en mér finnst það samt kúl,“ segir Hrafnkell Örn Guðjónsson, eða Keli, trommuleikari sveitarinnar Agent Fresco, þegar blaðamaður spurði hann hvort það væri satt að sveitin væri sú fyrsta frá Íslandi til að spila í Armeníu – en Arnór Dan, söngvari sveitarinnar, greindi frá þessu á Twitter á miðvikudaginn.

Hvernig var svo Armenía?

„Það var bara alveg klikkað. Þetta er held ég skrítnasti staður sem við höfum spilað á – ég veit eiginlega enn þá ekkert um þetta land nema að þetta er þarna við hliðina á Sýrlandi og Írak. En það er alveg mjög kúl.“

Hvernig var stemmingin – líður þér eins og þið séuð frægir í Armeníu núna?

„Það var stemming þarna og já, við erum alveg „huge“ í Armeníu – heimsfrægir í Armeníu,“ segir Keli hlæjandi. „Það er mjög skrítið að fara svona langt í burtu og fólk þekkir lögin okkar. Við spiluðum þarna eina tónleika á festivali. Þetta voru sko alveg sex flug á einni helgi – mjög gaman,“ segir Keli sem hefur farið í ansi mörg flug upp á síðkastið enda hefur Agent Fresco verið að túra töluvert upp á síðkastið en Keli segir þá samt vera að hægja á sér svolítið núna.

„Við erum að minnka þetta því að við erum að semja nýja plötu. Þetta eru bara svona vel valdir tónleikar núna þessa dagana.“

Spurður út í nýju plötuna segir Keli hana vera á algjöru byrjunarstigi svo að það er aðeins of snemmt að byrja að tala um dagsetningar og annað í sambandi við hana – en það er óhætt að segja að aðdáendur Agent Fresco geti glaðst við fréttirnar. Plata þeirra drengja, Destr­ier, var á nánast öllum betri topplistum fyrir árið 2015, meðal annars í Fréttablaðinu þar sem hún vermdi þriðja sætið. Einnig hafa þeir hlotið gríðarmikið lof fyrir tónleika sína en The Independent lofaði þá í hástert fyrir frammistöðu sína á hátíðinni Be Prog! My Friend í fyrrasumar og sagði sveitina auk þess vera eina mest spennandi hljómsveit í heiminum í dag.

Keli var svo í stærðarinnar viðtali í Drumhead Magazine á dögunum. Blaðamaður viðurkennir vankunnáttu sína í trommuumfjöllun en Keli segir um að ræða annað besta trommutímarit heims, sem samkvæmt honum er víst stór bransi þar sem tvö tímarit standi upp úr – Drumhead Magazine er annað þeirra.

„Þetta er blað fyrir trommara – eða fyrir fólk sem hefur áhuga á að lesa um trommur. Sko, hinum almenna borgara finnst þetta kannski ekkert rosalega skemmtilegt, en mér finnst þetta alveg geðveikt. Þetta voru alveg fjórar opnur – myndir og viðtal og allt,“ segir Keli ákaflega stoltur og það má hann líka alveg vera.