Lögreglumaðurinn játar sök að hluta

Sigurður Árni Reynisson, lögreglumaðurinn sem ákærður er fyrir brot í starfi og líkamsárás gegn fanga, játaði sök að hluta við þingfestingu málsins í Héraðsdómi Reykjavíkur í morgun.

Hann neitaði þó að hafa skellt höfði brotaþola tvisvar í gólf og neitaði að áverkar mannsins sem tilgreindir voru í ákæru væru af hans völdum. Hann sagðist hafa sett fangann í gólfið en ekki hafi verið ásetningur að skella höfði hanns í gólfið.

Hann viðurkenndi jafnframt bótaskyldu í málinu en mótmælti fjárhæðinni sem farið er fram á, sem eru tvær milljónir króna.

Maðurinn er ákærður fyrir að hafa farið offari þegar hann hugðist flytja fanga úr fangageymslu og fyrir dómara í maí á síðasta ári. Hann er sakaður um að hafa beitt fangann ofbeldi með þeim afleiðingum að hann hlaut áverka á hnakka, ökkla og rifbeini.

Ógnaði fanganum

Í ákærunni segir að lögreglumaðurinn, sem er á fimmtugsaldri, hafi handjárnað fangann fyrir framan búk, tekið um hálsmálið á peysu hans, ýtt honum upp að vegg og tekið hann niður í gólfið. Þá hafi hann sett hægra hné sitt á bringu fangans, haldið enn um peysu hans við hálsmál og skellt höfði hans tvisvar í gólfið.

Jafnframt segir að lögreglumaðurinn hafi ógnað fanganum með því að halda krepptum hnefa sínum framan við andlit hans og því næst dregið hann, með því að halda í föt hans, út fangaganginn og að lyftu í fangageymslu.

Fanginn hlaut af þessu blæðingu í og undir húð á hnakka, eymsli og væga bólgu yfir liðbandi í hægri ökkla og grunur var um riftbrot á einu rifi vinstra megin. Hann krefst tveggja milljóna króna úr hendi lögreglumannsins í skaðabætur.

Lögreglan óskað eftir úttekt á vinnubrögðum

Lögreglan á höfuðborgarsvæðinu hefur óskað eftir því við ríkislögreglustjóra að gerð verði óháð úttekt á vinnubrögðum innan embættisins í kjölfar máls Sigurðar Árna. Honum var vikið úr starfi í mars síðastliðnum, níu mánuðum eftir að atvikið á að hafa átt sér stað.

Í tilkynningu frá lögreglu þann 30. mars síðastliðinn sagði að mistök hafi verið gerð í þeim efnum og að tryggja þurfi að mál sem þessi fái afgreiðslu strax. Hins vegar hafi ekki verið talin, í ljósi lagalegra fordæma, heimild til að víkja lögreglumanninum úr starfi þegar það kom til álita, meðal annars vegna þess hversu langt var liðið frá því að málið kom upp.

Sigríður Björk Guðjónsdóttir lögreglustjóri og Jón H.B. Snorrason, sem var starfandi lögreglustjóri í fjarveru Sigríðar á þeim tíma sem atvikið kom upp, segjast ekki hafa vitað af atvikinu fyrr en í janúar síðastliðnum, eða sjö mánuðum eftir að það var kært.