Halldór Sanne telur sig hafðan fyrir rangri sök

Halldór Viðar Sanne, dæmdur fjársvikari, segist beittur órétti og röngum sakargiftum. Hann situr í gæsluvarðhaldi grunaður um milljónasvik með því að hafa fé af fólki á leigumarkaði.

„Umbjóðandi minn telur sig borinn röngum sökum og hefur í yfirheyrslum tjáð lögreglu að hann sé saklaus,“ segir lögmaður hans Steinbergur Finnbogason.

„Gæsluvarðhaldsúrskurður hefur verið kærður til Hæstaréttar,“ segir Steinbergur enn fremur.

Fjöldi aðila hefur á síðustu vikum lagt inn kærur til lögreglu þar sem þeir telja sig svikna af Halldóri Sanne. Grímur Grímsson yfirlögregluþjónn sagði við Fréttablaðið í gær að kærur væru enn að berast lögreglu og því ekki vitað með vissu hversu margar kærurnar yrðu í heildina. 

Fréttin birtist fyrst í Fréttablaðinu