Svona verður útsýnið úr grænlenska fangelsinu

Verði sjómaðurinn, sem nú situr í gæsluvarðhaldi, ákærður og dæmdur gæti hann fengið að afplána í fyrsta lokaða fangelsi Grænlands, sem nú rís í Nuuk.  Í fréttum Stöðvar 2 voru sýndar myndir af framkvæmdum og rætt við fangelsismálastjóra Grænlands. 

Þeir segja að engir fangar í heiminum fái betra útsýni því allir fangaklefar verða með glugga út á fjörðinn. Við blasa stórkostlegir fjallatindar og mögnuð fjarðamynni þar sem skipin sigla út og inn, eins og sjá má í spilaranum hér að ofan. Naaja Nathanielsen er fangelsismálastjóri Grænlands:

„Þetta er nýja fangelsið á Grænlandi. Þetta verður fyrsta lokaða fangelsið hér. Það verður líka opin deild. Það eru þegar sex gæslustofnanir á Grænlandi sem hýsa fanga bæði í gæsluvarðhaldi og afplánun,“ segir Naaja.

Alls verður pláss fyrir 76 fanga, þar af 40 á lokuðu deildinni, og mikið lagt upp úr kennslu, líkamsrækt og sálgæslu. Byggingarnar verða alls um átta þúsund fermetrar og kostnaður er áætlaður um 5,7 milljarðar íslenskra króna.

Refsingar á Grænlandi hafa þótt frjálslyndar. Líkt og í Vernd á Íslandi eru fangar frjálsir yfir daginn og á Grænlandi geta þeir fengið leyfi til að fara á veiðar með skotvopn en undir eftirliti.

„Það hefur ekki verið hefð fyrir því að vera með fangelsi í grænlenskri réttarmenningu. Menn hafa meiri trú á betrun og því að refsingar stoði ekki heldur þurfi að veita fólki betri tækifæri til að halda áfram. Það hefur verið grundvallaratriði í fullnustukerfi okkar,“ segir Naaja.

Til þessa hafa grænlenskir fangar sem hljóta þyngstu dómana þurft að afplána í Danmörku. Grænlendingum hefur sviðið að þeirra eigið fólk sé sent burt til afplánunar í öðru landi en um 30 grænlenskir fangar sitja nú inni í Danmörku.

„Það eru þeir sem eru of hættulegir til þess að geta verið hér eða þá að glæpir þeirra hafa verið svo hrottalegir að ákveðið hefur verið að vista þá á réttargeðdeild eða lokuðu fangelsi í Danmörku.“

-En er líklegt að Grænlendingur sem til dæmis yrði dæmdur í fangelsi á Íslandi myndi afplána dóminn í þessu nýja fangelsi í Nuuk?

„Ef hann er dæmdur á Íslandi fyrir glæp sem hann framdi þar þá er það íslenska kerfið sem tekur við honum. Eftir það er hægt að sækja um að hann verði fluttur aftur til Grænlands á einhverjum tímapunkti. Það er á borði íslenskra yfirvalda,“ svarar Naaja Nathanielsen.

Áætlað er að nýja fangelsið verði tilbúið sumarið 2018 og verður þá öllum grænlenskum föngum í Danmörku boðið að flytjast heim.