Nýjar leiðir kannaðar á uppgjöri sanngirnisbóta

Í nýrri skýrslu Vistheimilanefndar um Kópavogshæli og Efra-Sel er eindregið mælst til þess að mótað verði nýtt fyrirkomulag um könnun og uppgjör sanngirnisbóta vegna illrar meðferðar og ofbeldis gagnvart börnum á stofnunum. Málið fer í ferli í ráðuneytinu að sögn dómsmálaráðherra.

Vistheimilanefnd var fyrst skipuð árið 2007 og var nefndinni falið að skila skýrslu um starfsemi Breiðavíkurheimilisins. Í kjölfar þeirrar skýrslu skilaði nefndin þremur skýrslum um önnur vist- og meðferðarheimili fyrir börn. Árið 2012 var ný vistheimilanefnd skipuð og henni falið að kanna málefni Kópavogshælis. Var það gert að beiðni Þroskahjálpar. 

Í lögum um sanngirnisbætur er það skilyrði fyrir greiðslu bóta að skýrsla vistheimilanefndar liggi fyrir. Í skýrslunni sem skilað var í fyrradag eru talin upp þrettán önnur heimili og stofnanir þar sem börn voru vistuð en engin skýrsla liggur fyrir.

„Spurningin sem liggur í loftinu er hvort niðurstaðan frá þeim heimilum sé ekki sú sama. Vitum við ekki hreinlega nóg til að geta dregið nokkuð almennar ályktanir?“ spyr Hrefna Friðriksdóttir, formaður vistheimilanefndar.

Í niðurstöðukafla skýrslunnar er stungið upp á úrbótum til að gera fyrirkomulag við greiðslu sann­girnis­bóta skilvirkari. Tillögurnar eru að stærstum hluta efnislega í samræmi við tillögur sem fyrri nefnd skilaði árið 2011. Þar var meðal annars stungið upp á að sýslumaður eða sjálfstæð stofnun sæi um verkefnið.

„Einnig er hægt að halda núverandi fyrirkomulagi. Það er hægt að fela nefndinni að skoða fleiri heimili en það útheimtir mikla vinnu. Þetta er gríðarlegt magn gagna og tímafrek vinna,“ segir Hrefna.

„Ég tel að það eigi að íhuga vel tillögur um breytt fyrirkomulag,“ segir Sigríður Á. Andersen dómsmálaráðherra. Spurning sé hvort ástæða sé til að leggja vinnu nefndarinnar nú til grundvallar á öðrum heimilum eftir atvikum. Málið fari nú í ferli í ráðuneytinu.

„Ég legg áherslu á að vandað sé til verka en það er ekki víst að það þjóni tilgangi að taka jafn langan tíma í þau mál sem á eftir koma,“ segir Sigríður.

Fréttin birtist fyrst í Fréttablaðinu.