Biður Þingvallagreninu vægðar

„Það hafa margir verið að furða sig á þessu,“ segir Aðalsteinn Sigurgeirsson, fagmálastjóri Skógræktarinnar, um fyrirhugaða eyðingu greniskógar á Þingvöllum.

Fréttablaðið sagði frá því á mánudag að fella ætti grenitré sem standa umhverfis sumarbústað næst Valhallarreitnum á Þingvöllum. Ríkið hefur keypt bústaðinn og hyggst fjarlægja hann ásamt trjánum sem Ólafur Örn Haraldsson þjóðgarðsvörður segir Þingvallanefnd telja hafa „slæm sjónræn áhrif“. Opna eigi lóðina fyrir almenningi.

„Það er í sjálfu sér ekkert skrítið að ríkið vilji kaupa upp sumarbústaðina og fjarlægja húsin en það er illskiljanlegt af hverju þarf endilega að höggva niður öll trén sem fólkið hefur gróðursett. Mér vitanlega eru þau ekki að valda neinu umhverfistjóni eða sálartjóni,“ segir Aðalsteinn Sigurgeirsson. „Það er prýði að þessum trjám, ekki síst vegna þess að þau er sígræn.“

Aðalsteinn gefur lítið fyrir þá skoðun að barrtré eigi ekki heima í þjóðgarðinum og séu þar eins og út úr kú.

„Þetta er bara ein af þessum söguminjum um hvað þjóðin er búin að vera að gera í ellefu hundruð ár á Þingvöllum. Um og upp úr aldamótunum þá var gróðursettur furulundurinn á Þingvöllum sem enn þá stendur. Eftir seinna stríð voru gróðursettir skógar meðal annars við Valhöll, við Hrafnagjárhallinn og víðar.“

Aðalsteinn minnir á að þegar gömul og stór grenitré næst Hótel Valhöll voru höggvin árið 2007 hafi verið sagt að það væri krafa heimsminjaskrár menningarstofnunar Sameinuðu þjóðanna (UNESCO) að allur erlendur gróður yrði fjarlægður af Þingvöllum.

„En þegar var farið að grennslast fyrir um málið kom í ljós að krafan kom ekkert frá UNESCO. Hún var bara sett inn í lýsingu Þingvallaþjóðgarðsnefndar á því sem hún ætlaði sér að gera ef Þingvellir kæmust inn á skrána. Síðan var látið í veðri vaka að krafan hefði komið að utan en ekki héðan innanlands. En þetta er algeng skoðun hjá þeim sem gefa sig út fyrir að unna íslenskri náttúruog meina þá umhverfi án allra útlendra plantna og trjáa,“ segir Aðalsteinn.

Að sögn Aðalsteins er umræddur lundur griðastaður fyrir plöntur og dýr.

„Skógurinn þarna, þó að hann sé greniskógur, er híbýli margra skógarfuglategunda og það eru ábyggilega margar tegundir platna og smádýra sem hafa gott af því að hafa skóginn í staðinn fyrir að hafa berangurinn á klöppinni sem var þarna fyrir,“ segir Aðalsteinn. Eitt af því sem helst vanti á Íslandi sé skjól.

„Það mun nú ekki bæta skjólskilyrðin þarna beinlínis að höggva niður öll trén sem skýla þinghelginni.“ 

-