Hörð gagnrýni á kerfisáætlun Landsnets

Skipulagsstofnun hefur uppi harða gagnrýni á kerfisáætlun Landsnets sem fyrirtækið vinnur að þess dagana. Rökstuðningur varðandi kosti jarðstrengja er óskýr að mati stofnunarinnar og setur Skipulagsstofnun fyrirvara við niðurstöður kerfisáætlunar.

Skipulagsstofnun segir að áhrif tillögunnar á náttúru landsins séu ekki fullnægjandi og að hugmyndir Landsnets um uppbyggingu falli ekki að áherslum sem koma fyrir í landsskipulagsstefnu á miðhálendinu sem samþykkt hefur verið á Alþingi.

Í umsögn skipulagsstofnunar um jarðstrengjakosti Landsnets segist stofnunin gera þá kröfu að ítarlega verið fjallað um jarðstrengi á mun skilvirkari hátt en gert sé í kerfisáætlun Landsnets en Landsnet segir takmarkað hvað hægt sé að leggja langa jarðstrengi.

„Hér er um grundvallaratriði að ræða varðandi ákvarðanir um framtíðaruppbyggingu og þróun raforkuflutningskerfisins. Því telur Skipulagsstofnun að gera verði kröfu um mun ítarlegri umfjöllun um þetta, þar sem færð eru frekari rök og skýrðar forsendur þessara takmarkana,“ segir í áliti skipulagsstofnunar.

„Ekki hefur verið lagt fullnægjandi mat á áhrif tillögunnar á víðerni. Einnig er ljóst að svo stórt inngrip að fara með háspennulínu yfir Sprengisand fellur illa eða ekki að þeim megináherslum sem fram koma í landsskipulagsstefnu um skipulagsmál á miðhálendinu,“ segir ennfremur í áliti Skipulagsstofnunar.

Guðmundur Ingi Guðbrandsson, framkvæmdastjóri Landverndar, tekur í sama streng. „Gagnrýni Skipulagsstofnunar á jarðstrengjahluta kerfisáætlunar er mjög í takt við þá gagnrýni sem við setjum fram og það vantar allar forsendur fyrir takmörkunum á uppgefnum hámarkslengdum jarðstrengja,“ segir Guðmundur Ingi.

Frestur til að skila inn athugasemdum við kerfisáætlun Landsnets rann út þann 10. janúar. Alls bárust umsagnir frá 31 aðila. Innsendar athugasemdir eru hluti af samráðsferli við vinnslu kerfisáætlunar og eru mjög mikilvægur þáttur í þróun hennar,“ segir Steinunn Þorsteinsdóttir, upplýsingafulltrúi Landsnets, en hún vildi ekki bregðast við athugasemdum Skipulagsstofnunar. „Við þökkum öllum þeim sem tóku þátt í þessu samtali og erum nú að vinna úr innsendum athugasemdum,“ segir Steinunn.

Fréttin birtist fyrst í Fréttablaðinu.