Einar Andri Einarsson, þjálfari toppliðs Aftureldingar í Olís-deild karla í handbolta og sérfræðingur 365 um HM í handbolta, segir að íslenska landsliðið hafi lengst af spilað vel gegn því makedónska í gær.
Ísland var með undirtökin lengst af en Makedónía sótti í sig veðrið á lokakaflanum og knúði fram jafntefli, 27-27. Það þýðir að Íslendingar mæta Frökkum í 16-liða úrslitum í Lille á morgun.
„Það var búinn að vera góður taktur í því sem við vorum búnir að gera. Við byrjuðum illa en spiluðum frábærlega í 40 mínútur. Á þeim tíma fengum við mikið af auðveldum mörkum og það var mikið sjálfstraust í liðinu,“ sagði Einar Andri í samtali við Hörð Magnússon í kvöldfréttum Stöðvar 2.
„En á síðustu 15 mínútunum hrökkva hlutirnir í baklás. Við fáum ekki þessi auðveldu mörk sem við höfðum fengið og þurftum að stilla upp á teig nánast í hvert skipti. Og það hefur verið vandamál hjá okkur á mótinu, þessi uppstillti sóknarleikur.“
Geir Sveinsson landsliðsþjálfari fékk mikla gagnrýni fyrir að taka ekki leikhlé í lokasókn Íslands sem endaði með skoti Rúnars Kárasonar sem var varið.
„Þetta er það sem við þjálfararnir erum alltaf að glíma við, hvenær rétti tímapunkturinn er. Að öllu jöfnu hefði maður vilja taka leikhléið þegar tæplega hálf mínúta er eftir,“ sagði Einar Andri og bætti við að færið sem Rúnari bauðst hafi reyndar verið áskjósanlegt.
Einar Andri segir svekkjandi að lenda í því að mæta heimsmeisturum og heimamönnum Frakka í 16-liða úrslitunum.
„Frammistaðan á löngum köflum í öllum þessum leikjum hefur verið mjög góð og við hefðum auðveldlega getað verið með fleiri stig. Miðað það sem strákarnir hafa lagt í þetta hefði óneitanlega verið skemmtilegra að mæta Norðmönnum, Brasilíumönnum eða Rússum. Í staðinn mætum við Frökkum á þeirra heimavelli, fyrir framan tæplega 30.000 manns og það verður verðugt verkefni,“ sagði Einar Andri.
Viðtalið í heild sinni má sjá í spilaranum hér að ofan.
Noregur
Ísland
