Fara fram á úrbætur á Reykjanesbraut án tafar

Bæjarráð Hafnarfjarðar lýsir yfir þungum áhyggjum vegna tíðra og alvarlegra slysa á Reykjanesbraut í Hafnarfirði og fer fram á að ráðist verði í úrbætur á brautinni án tafar.

Í bókun bæjarráðs er skorað á samgönguyfirvöld að hefja nú þegar undirbúning að öllum framkvæmdum við brautina sem hafi verið á samgönguáætlun til margra ára en án fjármagns.

„Það er mjög aðkallandi að ljúka framkvæmdum og tryggja umferðaröryggi vegfarenda á þeim hluta brautarinnar sem liggur í gegnum Hafnarfjörð þar sem umferðarþungi hefur aukist gríðarlega á undanförnum árum og fer vaxandi,“ segir í bókuninni.