Opna þrjú sértæk rými

Fulltrúar Sjúkratrygginga Íslands og Reykjavíkurborgar undirrituðu fyrir helgi samning um rekstur þriggja sértækra hjúkrunarrýma á Droplaugarstöðum. Rýmin eru ætluð fólki með þörf fyrir mikla og sérhæfða hjúkrun og umönnun, t.d. vegna meðferðar í öndunarvél.

Samhliða undirritun samnings um rekstur rýmanna var undirritað samkomulag milli ráðuneytisins og borgarinnar um að ráðuneytið fjármagnaði nauðsynlegar húsnæðisbreytingar og kaup á búnaði og tækjum. Rekstrarkostnaður rýmanna þriggja verður greiddur úr ríkissjóði.

Reiknað er með að íbúar sem flytjast í varanlegu rýmin tvö séu einstaklingar sem að öðrum kosti þyrftu að dvelja til langframa á Landspítalanum.