Suðurlandsvegi í Flóa lokað vegna umferðaróhapps

Suðurlandsvegi í Flóa, austan við Selfoss, á milli Kjartansstaða og Bitru, hefur verið lokað fyrir umferð um óákveðinn tíma vegna umferðaróhapps.

Mjólkurbíll valt á veginum á tíunda tímanum, en lögregla segist ekki geta veitt frekari upplýsingar um málið að svo stöddu.

Uppfært kl 12:

Ökumaðurinn er ekki talinn alvarlega slasaður. Hann er fastur í bílnum og unnið er að því að koma honum út úr honum svo hægt sé að flytja hann á slysadeild. Hann er einn í bílnum.

Lögregla gerir ekki ráð fyrir að hægt verði að opna fyrir umferð í bráð. Vinnuvélar þurfi til þess að fjarlægja bílinn af veginum, en hann liggur þvert yfir veginn og því lokað fyrir umferð í báðar áttir. Færðin er nokkuð slæm og telur lögregla að það muni taka nokkra stund að koma öllum þeim tækjum og tólum sem til þarf á staðinn.

Fólki er bent á að fara hjáleið um vegi nr 305 og 302.

Uppfært kl. 13.15:

Búið er að opna fyrir umferð um Suðurlandsveg.