Akureyringar hækka frístundastyrkinn um tuttugu prósent

Íþróttaráð Akureyrarbæjar hefur samþykkt að hækka frístundastyrk til niðurgreiðslu á æfinga- og þáttökugjöldum barna og unglinga í bænum úr 16 þúsund í 20 þúsund krónur, eða um tuttugu prósent.

Í tilkynningu frá bænum segir að ákvörðunin hafi verið tekin við gerð fjárhagsáætlunar fyrir árið 2017.

„Frístundastyrkurinn hefur nú hækkað um 40% frá 2015.

Frá árinu 2006 hefur Akureyrarbær veitt styrk til allra barna og unglinga á Akureyri til niðurgreiðslu þátttökugjalda hjá íþrótta-, tómstunda- og æskulýðsfélögum á Akureyri. Styrkurinn tekur gildi árið sem barnið verður 6 ára og fellur úr gildi árið sem unglingurinn verður 18 ára.

Til að nota frístundastyrkinn skal fara inn á heimasíðu þess íþrótta-, tómstunda- og/eða æskulýðsfélags þar sem skrá á barn. Þar er hlekkur á skráningarsíðu þar sem foreldrar skrá iðkendur. Í skráningar- og greiðsluferlinu geta foreldrar valið um að nota frístundastyrkinn frá Akureyrarbæ.

Íþrótta-, tómstunda- og æskulýðsfélögin veita aðstoð og upplýsingar um skráningu, greiðslu og notkun frístundastyrks hjá hverju félagi fyrir sig.

• Árið 2017 gildir styrkurinn fyrir börn fædd árið 2000 til og með 2011
• Frístundastyrkurinn gildir frá 1. janúar til 31. desember ár hvert

Upplýsingar er einnig að finna á eftirfarandi vefslóð, www.akureyriaidi.is,“ segir í tilkynningunni.