Bensínþjófum gert að greiða Atlantsolíu bætur

Tveir karlmenn á sjötugsaldri voru í Héraðsdómi Reykjaness í gær dæmdir til að greiða Atlantsolíu rúmar fimm milljónir í bætur fyrir að hafa stolið eldsneyti á sjálfsafgreiðslustöðvum bensínstöðvarinnar fyrir tæplega 5,5 milljónir króna.  Þeir voru í júní í fyrra sakfelldir fyrir verknaðinn.

Atlansolía fékk þær bætur sem félagið krafðist, alls 5.053.829 kr, en mennirnir voru ákærðir fyrir að hafa stolið eldsneyti fyrir tæplega 5,5 milljónir króna á tíu mánaða tímabili; frá maí 2013 til mars 2014.

Annar maðurinn hafði starfað hjá tæknideild Atlantsolíu. Hann hafði undir höndum lykil til að opna læst hólf á eldsneytisdælu og aftengdi þannig svokallaðan eldsneytisteljara fyrir dæluna. Að því loknu notaði hann greiðslukort í sjálfsala og greiddi með því lága upphæð, eða á milli eitt til tvö þúsund krónur, eftir atvikum.

Þá var hann sagður hafa sett eldsneyti á bíla annarra og á brúsa. Hinn maðurinn lagði til sendibifreið og sá þannig um flutning á tunnum og brúsum á vettvang, sem og að dæla eldsneyti í ílátin. Þetta eru þeir sagðir hafa gert í 101 skipti fyrir alls 5.438.927 krónur.

Mennirnir játuðu báðir brot sín. Annar þeirra samþykkti bótakröfu Atlantsolíu en sá er ógjaldfær, að sögn meðstefnda fyrir dómi. Hinn hafnaði kröfunni.  

Þeir voru báðir sakfelldir vegna málsins í júní í fyrra. Annar þeirra var dæmdur í níu mánaða fangelsi, þar af sex mánuði skilorðsbundna, og hinn í sex mánaða fangelsi, þar af fjóra mánuði skilorðsbundna. Fimm daga gæsluvarðhald kemur til frádráttar. Sá sem hlaut þyngri dóm hefur einu sinni áður verið gerð refsing, en það var árið 2006 fyrir fjársvik. Hinn hefur ekki verið dæmdur áður.