Íbúar í slökkvistarfi með garðslöngu

Eldur kom upp í ruslageymslu í Ljósheimum á fjórða tímanum í dag og var reykur frá eldinum farinn að berast upp í gegnum ruslalúgur. Allt tiltækt slökkvilið var sent af stað en í ljós kom að um minniháttar eld var að ræða. Íbúar höfðu þá gripið til slökkvistarfs í ruslageymslunni með garðslöngu.

Samkvæmt Slökkviliði höfuðborgarsvæðisins voru íbúar búnir að slökkva eldinn að mestu þegar slökkviliðsmenn bar að garði og virðist sem að allt hafi farið á hinn besta veg. Þá voru ruslalúgurnar ekki innandyra og því þurfti ekkert að reykræsta og engar reykskemmdir urðu nema í ruslageymslunni sjálfri.