124 útskrifuðust frá Bifröst

124 nemendur voru í dag útskrifaðir frá Háskólanum á Bifröst úr öllum deildum skólans, námi í verslunarstjórnun og Háskólagátt.

Í útskriftarræðu sinni til nemenda vék Vilhjálmur Egilsson rektor að því að skólinn hafi treyst stöðu sína sem gæðaskóli og að áfram verði sótt fram á þeim vettvangi. Þá hafi aðsókn í meistaranám verið sérstaklega góð og hópur meistaranema sem hefji nám í haust verði sá stærsti sem sést hefur.

„Það er gaman að fylgjast með Bifrestingum á vinnumarkaðnum. Við sjáum víða fréttir af þeim og lesum um hvað þeir eru að gera og hvernig námið á Bifröst hefur gagnast. Við bíðum spennt eftir því að sjá hvaða afrek útskriftarnemar okkar í dag eiga eftir að vinna. Þau munu örugglega láta að sér kveða,“ sagði Vilhjálmur meðal annars í ræðu sinni.

Þá ræddi Vilhjálmur einnig um að stjórn skólans hafi ákveðið að boða til mikils stefnumótunarfundar á Bifröst næsta haust og vonast sé eftir breiðri þátttöku úr hópi aðstandenda skólans, starfsfólki og nemendum. Vonast sé til þess að fundurinn muni styrkja enn frekar innviði skólans og samstöðu.

Útskriftarverðlaun hlutu í grunnnámi Þórdís Sif Arnarsdóttir viðskiptadeild, Ásdís Hrönn Pedersen Oddsdóttir, lagadeild og Ingunn Bylgja Einarsdóttir, félagsvísindadeild.

Útskriftarverðlaun hlutu í meistaranámi Helga Dröfn Þórarinsdóttir viðskiptadeild, Lilja Björg Ágústsdóttir lagadeild og Ása Fanney Gestsdóttir félagsvísindadeild.

Að auki fengu eftirfarandi þrír nemendur felld niður skólagjöld á haustönn í tilefni af framúrskarandi námsárangri, þau Vera Dögg Höskuldsdóttir viðskiptadeild, Sonja Hafdís Pálsdóttir lagadeild og Pétur Steinn Pétursson félagsvísindadeild. Verðlaunanemandi í Háskólagátt var Fanney Valsdóttir.