Trúnaðarmaður segir starf Fjölbrautarskólans í Ármúla stopp

Unnar Þór Bachmann, trúnaðarmaður kennarara í Fjölbrautaskólanum Ármúla, segist hafa „einhvern veginn á tilfinningunni að það sé verið að reyna að skemma kerfið til þess að koma einkavæðingu á“.

Þetta kemur fram í færslu Unnars Þórs í Facebook-hópi meðal framhaldsskólakennara. Ekki náðist tal af Unnari í gær en í Facebook-færslunni segir hann alveg ljóst að FÁ hafi laskast í þessu ferli. Fimm kennarar séu farnir og skólastjórinn. „Ekki hefur verið hægt að endurskoða fjarnámssamning, skóladagatal eða annað í skólastarfinu,“ segir hann um afleiðingarnar.

Kristján Þór Júlíusson menntamálaráðherra sagði við Vísi í gær að ekki stæði til að sameina Menntaskólann í Reykjavík og Kvennaskólann líkt og Linda Rós Michaelsdóttir, kennari í MR sem starfaði um skeið sem rektor skólans, sagðist í Fréttablaðinu í gær gruna að væri í undirbúningi. Þann grun byggði Linda á því að ekki hefur enn verið auglýst eftir nýjum rektor fyrir MR jafnvel þótt sá sem nú gegni stöðunni hafi sagt starfinu lausu fyrir nokkru.

„Það er í sjálfu sér ekkert skrítið að fólk sé að velta fyrir sér ýmsu varðandi framhaldsskólann,“ sagði Kristján Þór við Vísi. Tíma tæki að átta sig hvernig breytingar í ríkisfjármálaáætlun varðandi framhaldsskóla myndu virka. Hann ítrekaði að ekkert nýtt væri að frétta varðandi ákvörðun um sameiningu Fjölbrautaskólans í Ármúla og Tækniskólans.

„Eðli málsins samkvæmt hljótum við að gera kröfu á stjórnvöld hvers tíma að þau skoði þá kosti sem í stöðunni eru þegar að nemendum á framhaldsskólastigi er að fækka um 600 á ári hér á höfuðborgarsvæðinu. Þá verðum við að skoða fyrirkomulag fræðslunnar.“

Í fyrrgreindri færslu á Facebokk segir Unnar Þór Bachmann að Sjálfstæðisflokkurinn, sem Kristján Þór er fulltrúi fyrir, hafi þanið kerfið út áður en síðan staðið fyrir því að draga það saman harkalega með styttingu námstíma til stúdentsprófs. „Samt er eins og ráðherrann hafi ekkert heildstætt plan til að bregðast við þeim vanda sem hans eigin flokkur stendur fyrir. Hann slær sameiningu MR og Kvennó út af borðinu en setur sameiningu FÁ og Tækniskólans í sameiningarferli sem hann er samt enn að kanna.“