Ævintýralegur sigur ÍR sem er komið upp úr fallsæti

ÍR vann ótrúlegan sigur á Þór Ak., 2-1, í Mjóddinni í 5. umferð Inkasso-deildarinnar í dag.

Staðan var markalaus fram á 86. mínútu þegar Sveinn Elías Jónsson kom Þórsurum yfir og staða þeirra því orðin vænleg.

ÍR-ingar lögðu ekki árar í bátar og á lokamínútunni jafnaði Viktor Örn Guðmundsson metin með þrumufleyg fyrir utan teig.

Þegar sex mínútur voru komnar fram yfir venjulegan leiktíma skoraði Sergine Modou Fall svo sigurmark ÍR-inga. Lokatölur 2-1, ÍR í vil.

Þetta var fyrsti sigur Breiðhyltinga í sumar og með honum komust þeir upp úr fallsæti. Þór er hins vegar í ellefta og næstneðsta sæti deildarinnar.

Upplýsingar um úrslit og markaskorara eru fengnar frá Fótbolta.net.