Hælisumsóknum fjölgaði um 60 prósent milli ára

82 einstaklingar sóttu um alþjóðlega vernd á Íslandi í maí. Samanlagður fjöldi umsókna á fyrstu fimm mánuðum ársins var 370 sem eru tæplega 60 prósent fleiri umsóknir en bárust á sama tíma á síðasta ári.

Þetta kemur fram í fréttatilkynningu frá Útlendingastofnun. Þar segir að það sem af er júnímánuði hafa fimmtíu sótt um vernd og sé því heildarfjöldi umsókna það sem af er ári 420.

„Fjölgunin samanborið við árið 2016, bendir enn til þess að fjöldi umsókna um alþjóðlega vernd á árinu geti orðið á bilinu 1700 til 2000.

Umsækjendur í maí voru af 17 þjóðernum, flestir komu frá Albaníu (29) og Írak (12). 46% umsækjenda komu frá ríkjum Balkanskagans. 78% umsækjenda voru karlkyns og 22% kvenkyns. 82% umsækjenda voru fullorðnir og 18% yngri en 18 ára. Þrír umsækjendur kváðust vera fylgdarlaus ungmenni.

Lyktir mála

Niðurstaða fékkst í 122 mál í maímánuði. 34 umsóknir voru teknar til efnislegrar meðferðar en þar af voru 12 mál afgreidd í forgangsmeðferð. 37 mál voru afgreidd með ákvörðun um endursendingu á grundvelli Dyflinnarreglugerðarinnar, 5 umsóknum var synjað vegna þess að umsækjendur höfðu þegar fengið vernd í öðru ríki og 46 umsækjendur drógu umsóknir sínar til baka eða hurfu.

22 þeirra 34 mála sem tekin voru til efnislegrar meðferðar lauk með ákvörðun um synjun og tólf með ákvörðun um veitingu verndar, viðbótarverndar eða dvalarleyfis af mannúðarástæðum.

 

545 einstaklingar í þjónustu

Um 545 einstaklingar njóta þjónustu í verndarkerfinu á Íslandi um þessar mundir, þar af eru um 235 manns í þjónustu hjá félagsþjónustu Reykjavíkurborgar, Hafnarfjarðarbæjar og Reykjanesbæjar, á grundvelli þjónustusamninga við Útlendingastofnun. Móttöku- og þjónustuteymi Útlendingastofnunar veita um 310 einstaklingum þjónustu í búsetuúrræðum stofnunarinnar.

 

Flutningar úr landi

Stoðdeild Ríkislögreglustjóra flutti 35 einstaklinga úr landi í maí. 20 einstaklingar yfirgáfu landið sjálfviljugir með stuðningi Útlendingastofnunar í mánuðinum og einn með stuðningi Alþjóða fólksflutningastofnunarinnar (IOM),“ segir í tilkynningunni.